Aydar küüyün F.Angeli adına gimnaziyasında birinci hem ikinci klaslarda gagauz dilindä açık derslär geçtilär. Regionda ikinci yıl hepsi okullarda enilenmiş kurikulum geliştiriler — obun baş daavası uşaklara meraklandırmaa aazdan lafetmeyi gagauz dilindä.

Açık derslerdä bulundular başlankı klasların üüredicileri türlü küülerdän hem kasabalardan hep ölä da üüretim bakannıın uzmannarı da. Üürenicilär kendi bilgilerini gösterdilär, cuvap verdilär soruşlara,dialogları kurdular, kullanarak gagauz dilini.

«Benim adım Eva, bän üürenerim 1-ci «A»klasta. Bän pek severim gagauz dilimi.bu urok bsna geçti pek sevgili».

«Bän severim benim Gagauziyamı. Bu urok prk islää geçti».

Derslerin birisi interaktiv uurda kuruluydu — oyunnarlar, lafetmäklän hem daavalarlan uşaklar cuvap ettilär hem aktiv kullandılar gagauz dilini, — dedi Aydar gimnaziyasının başlankı klaslar üüredicisi Anna Kalak: «Şindiki vakıtta pek isteerlär üürenmää. Onuştan onnarlan her keret lafettiynän, uşaklar taa islää uureneceklär da git-gidä taa islää lafedeceklär ana dilindä, urok nietlerini tamannadı, ne koyduk nietimizä biz yaptık. Sanêrım, ani ötää dooru 2-3 klasta onnar taa gözäl lafedeceklär».

Açık derslerdän sora «Analarlan-bobalarlan barabar» olayı geçirildi — burada uşaklar analarlan pay aldılar.Onnara türlü daavalar verildilär — kurmaa cümlä- annatma, soruşlara cuvap etmää hem lafetmää adetlär için sadece gagauz dilindä.

«Isteerim sölemää saa olsunnar, ani teklif ettilär, bu olay faydalı geldi, neçin ki uşaklar, analara-bobalara da neçin deyni- uşaklara örnek, ani mamusu yanında yardımcı olêr ona, biz da sevineriz, goreriz ne bilerlär Bizim uşaklar».

«Uşak anasız ilerleyämer, zor ona, anasınnan barabar o gider ötää dooru. yardım ettik .. ana dili lääzım ilerlesin, yaşasın halkımız, biz burada duuduk, isteeriz uşaklarımız da burada büüsün».

Bölä olaylar vererlär kolaylık uşaklara taa yakın olmaa Gagauz dilinä hem kullanmaa onu taa sık, — nışannadı Gagauziya üüretim bakannıın dillerin ilerlemesindä bölümün başı Mariya Uzun: «Bütün ürektän var nicä söliim, ani uşakların bilgi uuru çok üüsek uurda, çünkü belli, ani uşaklar — ayledän çekiler, da lafederlär bu dildä. Diil sade derstä işiderlär, ama lafederlär analarlan-bobalarlan da, annȇrlar üürediciyi, yok ölä, ani sakınȇrlar biri-birindän, içtän kendi uurunda gider iş, gösterer, ani bizim uşakalrımız gerçektän sever kendi ana dilini».

Gimnaziyada saerlar, ani bölä derslär hem buluşmaklar yardım ederlär üüretim proţesini taa açık yapmaa hem meraklandırmaa diil sade uşakları, ama anaları-bobaları da, — urguladı F.Angeli adına gimnaziya başı Nadejda Koçanji: «Bu iki yılın içibdä may 50 uroktan zeedä biz gezdik herbir rayonda — Çadır dolayında, Vaklaneş, Komrat dolayında. Savaştık etiştirmää çözmää kimi zorları, kimi ne olmȇȇr, angı uurda lääzım dıışılmäk olsun. Deyecez — diil enidän metodlar, ama yaklaşım başka türlü lääzım olsun — urgulansın lääzım lafetmäk uuru, sözleşmäk uuru. Gramatikada mutlak okumak yazmak — onnar da lääzım işlesinnär maasuz lafetmeyä».

Açık derslär hem tematikalı olaylar geçirilerlär Gagauziyanın üüretim kurumnarında başlankı klaslarda enilenmiş kurikulumun geliştirilmesi sınırlarında.