GHT kabletti kararı başkan postunu serbest saymaa. Bunun temelindä durȇr o, ani kuvedä girdi daava kararı, angısına görä Guţul Evgeniyaya kanona karşı partiya finanslaması için edi yıl kapan verildi. Ama avtonomiya başın enidän ayırılması için seçimnerin günü belli edilmedi- teklif edilmiş noyabrinin 15-şi lääzımnı sayıda ses almadı. Deputatların bir payı söledi, ani lääzım beklemää eni seçim kodeksin kabletmesini. Bu kanon proektini parlament avgustun bitkisindä ikinci okumakta bakacek. Taa derindän Nat. Andrieş.
İyül ayın 31-dä GHT oturuşu, neredä lääzımdı bakılsın başkan postu serbest olması için soruş geçmedi, neçinki kvorum yoktu. Bu sefer oturuşta 20 deputat vardı. GHT başın Valentin Gaydarjinın laflarına görä karar kabledildi o üzerä, ani kuvedä girdi daava kararı, angısına görä Guţul Evgeniyaya kapan verildi.
VALENTİN GAYDARJİ GHT başı
«Moldova devletin ceza kodeksin 466 statyanın üçüncü punktuna görä, Gagauziya ayırı hak statusu için kanonun 15 statyanın üçüncü punktuna görä, Gagauziya Temel kanonun 51-ci hem 71-ci statyalarına görä belli etmää, ani Gagauziya başkanın postu serbest oldu, neçinki şindiki başkana karşı Apeläţiya palatanın kararı kuvedä girdi».
Deputatların bir payı söledi, ani lääzım başkan postunu serbest saymaa, ama seçimnerin gününü çıkarmaa karardan. Bölä iniţiativayı teklif etti GHT deputatı Nikolay Ormanji.
NİKOLAY ORMANJİ GHT deputatı
«Kim inaner, ani Başkan Evgeniya Guţul dönecek başkan postuna? Kimsey inanmȇȇr. Ozaman neçin biz bu soruşu hergün kaldırȇrız? Teklif ederim bu kararda ona görä, nicä sölärdi bizim üridik izmetimiz, başkanın postunu serbest saymaa, ama avgustun 24-nä kadar seçimnerin gününü kabletmemää, neçinki parlament ikinci okumakta seçim kodeksini kabletmedi, da biz bilmeeriz, nesoy kurallara görä seçimnär geçeceklär».
Başka deputatlar istedilär bu soruşu çıkarmaa günün iş sırasından alarak esaba onu, ani Moldova parlamenti taa kabletmedi ikinci okumakta seçim kodeksini. Bu oluş bekleniler avgustun 24-dä. Nicä bildirtti GHT deputatı Demyan Karaseni Başkan postu serbest tanıması durumu diiştirmeer.
DEMYAN KARASENİ GHTdeputatı
«Bän taa bir keret danışȇrım fikircesinä kararı kabletmää. Ondan, ani büün biz kaldıracez ellerimizi da Başkan postunu serbes sayacez bişey diişmeyecek. Neçinki biz bilmeeriz ne olacek GHT, nezaman deputatlar ayırılacek. Biz lääızm bu soruşu çıkaralım avgustun 24-nü beklämeyelim da görecez nesoy Seçim kodeksini ikinci okumakta parlament kabledecek».
Grigoriy Dülger hem taa birkaç deputat istämedilär ses vermäk proţesinä katılmaa. Onnar urguladılar, ani üristlär bir fikirä bu soruşta gelmedilär. Ses vermäk iki punkta görä geçti. Saymaa başkan postunu serbest kendi sesini 11 deputat verdi. Ama noyabrinin 15-şindä başkan seçimnerini geçirmää bu soruş lääzımnı kadar ses almadı. Seçim gününü deputatlar belli edeceklär gelän oturuşta.