Mariya Zabun, bir asir uzunnuu yaşamak yolunda zorlukları, fukaarelii hem, elbetki, kısmeti görän bir insan. Bu günnerdä o 95-ci yaşını tamannadı, ama büünnän -büün yaşamaya büük sevgiylän her gün  adımını atȇr.

Mariya Ananyevna Zabun Tülüküüyün yaşayanı 1932-ci yıldan, çokuşaklı çiftçi aylesindä dünneyä gelmiş.  Bobası kürkçü, anası ev izmetçisi, bütün yaşamakları çalışarak uşaklarını büütmüşlär.

«Bizi pek islää üürettilär. Benim bobam pek işçiydi. O kürkçüydü. Keptar dikärdi. Gecä-gündüz işläärdi. Gecedä iki saat işläärdi. Yaz vakıdı deeri sepeläärdi, paklaardı, kış vakıdı da bütün kış dikärdi. Okadar işçiydi benim bobam»,-  Mariya Ananyevna Zabun söledi.

Mariya Ananyevna Gagauz halkının istoriyasında olan olayların çoyuna martur olmuş hem büünnän- büün aklısında ayın- açık tutȇr. Aaçlık vakıdında bobasını, zengin olduu için, kapana kapamışlar.

«Biz sade sırtımızda rubalarımızlan kaldık. Yırtık parça palaları da erdän aldılar. Benim bobam zengindi, dä bizdä pek çok işlär vardı.  Veelka da, papşoy maşınası da, borna da, puluk ta, dikmää maşina da- hepsi, ne lääzımdı ayleyä, hepsi vardı bizdä»,- Mariya Ananyevna Zabun söledi.

Evlener Mariya Ananyevna komuşu çocuuna. Aylä yaşaması kısaymış, 53 yaşında dul kalmış, ama kısmetli hem saygılı yaşamayı kocasınınnan yaşamış.

«Benim adamım beni pek sevdi, o pek işçiydi. Komuşu çocuydu . Bän pek işçiydim evdä, işleri yapardım, o da kolhozda bütün yaşaması işledi, evdä hiç kalmadı»,- Mariya Ananyevna Zabun söledi.

Bu kısmetli ayledä 4 uşak dünneyä gelmiş, 3 ool, bir dä kız. Büün aylenin 4 boy evladları var, 30 kişidän zeedä.

«Hepsi daaldı, torunnarın biri dä yok küüydä. Uşakların uşakları da, pralar da yok biri evdä»,- Mariya Ananyevna Zabun söledi.

Büün Mariya Ananyevna evlerdä kalan oolununnan yaşȇȇr, ama küüydä yaşayan kızı  da onu yalnız brakmȇȇr.

Vera Pançeva Tülüküüyü yaşayanı: «Saa olsun, ani büünkü gündä saalıklı, iilikli kendi-kendiciini bakȇr, evdä var kişisi, mancasını , imeesini vererlär. Bin kerä şükür ederiz Allaha, ani anam büünkü gündä yaşȇȇr. Saalık, iilik ona!»

Mariya Ananyevna gibi insannar-Gagauziyanın hodulluu. Onnarın annatmakları vererlär kolaylık herbirimizä dolayımızın istoriyasını bilmää hem büünkü günnerin kıymetini annamaa.