Deniz askercilerin günü — özel bir data onnara deyni, kim Andreev bayraa altında askercilik etti. Pötr Kuru hem Pavel Tulba bu yılları büük hatırlan anȇrlar. İkisi dä — denizçi.
Deniz askercilii — akına yaşamak okulu, sölerlär Pötr Kuru hem Pavel Tulba. Onnar açıklȇrlar, ani askercilik onnarın harakterini kurdu. Evdän onnar körpä delikanı çıktılar, geeri — pelivannar döndülär. Denizdä askercili onnarı hep ölä cuvaplı olmaa üüretti.
«Askercilää gittim açan — körpäydim, ama oradan geldim girgin genç olan. Askercilik dooru işleri üüreder. Fikirin diişer taa cuvaplı olȇrsın»,- annattı Pötr Kuru.
Deniz askercilii — özel bir askercilik, söleer Pavel Tulba. O bunun için küçüklüündän bilärdi, çünkü bobası burada asker izmetini götürdü, da ooluna sır-sık annadardı. Bu üzerä Pavel Tulba sevindi, açan üürendi, ani denizdä askercilik edecek. O Sovet birliin deniz sınırlarını korudu.
«Bän denizçilik için küçüklüümdän bileerim. Boban denizdä askercilik etti. 1971-cidä Denizçilär asoţiaţiyası kuruldu. Bän onnarın yortularına bobamnan gidärdim. Denizçilik için annatmaları sesleyärdim»,- söledi Pavel Tulba.
Deniz için Pavel Tulbaa saatlan var nicä annatsın, okadar o onu sever. Deniz dalgaları, günün düüması hem batısı. Asker izmeti — bu olaylar için onun canında özel bir er var. Armata bittiktän sora, evä döndüynän Pavel Tulba dayanamȇȇr, da balıkçı gemisindä işlemää başlȇȇr.
«Biz denizdä sınırları koruyardık. 2-3 aya denizä çıkardık. Başlayardık Üülen kurilılardan. Koruyardık sınırları Poyraz kurılılarda, Çukotkada, Komandor yarı adalarında»,- paylaştı Tulba.
Askercilik foto albomnarı — en büük hatır askercilik yılları için. Bu patretlerdä dostlar, meraklı kıpımnar, güldürücü momentlär. Bu albomnarın sayfalarını aktararak onnar sansın geridä kalan yıllara dönerlär da genä matros olȇrlar.
«Bu asker dostlarımın patretleri. Var bizim erlerdän çocuklar da»,- nışannadı Kuru.
Çok yıl artık geçti, ama deniz askercilik günnerini onnar gurulan anȇrlar. Çizgileyeräk, ani ȇlita askerindä vatanına borcunu verdilär.