O dikmeer sade — o zamandaş, stilli hem unikal rubaları yaradȇr, herbirinä dä canını koyȇr. Çebanova Evdokiya için materiyaylan işlemäk — diil sade zanaat, o haliz incäzanaat. Sevgili zanaat ona deyni ömürün temeli. 

Evdokiya Çebanova üçüncü soyda terzi. Malisi terzilik edärmiş, lelüsu, şindi da  terzilik zanaatını götürer. Ama Evdokiya taa dizayner da. Rubalara ȇskizleri kendisi çizer. Onun yaradıcılık bakışı tekrarlanmaz modelleri dünneyä getirer.

«Bölä gölmek biyaz – o gider baza, angısı herbir rubaya uyȇr, yakası, enneri klasika, onnara bişey eklenmeer. O baza giimi. Bölä yaptım bir korset. O bana lääzımdı foto çekiminä.  Üstünü ellän topladım. Altında korset. Giidiynän, önündä kalp durȇr. Onu giidim bölä bir eteklän»,- söleer Evdokiya. 

Ömürün zanaatını Evdokiya çok düşünmemiş, küçüklüündän bilärmiş, angı zanaatı seçecek.

«Çok düşünmedim, kim isteerim olmaa. Çeketmedän bilärdim, ani dizayner, terzi isteerim olmaa. O tam benim için di»,- söleer Evdokiya. 

Dizaynerlik işindä Evdokiya erindä durmamayınca enilikleri geliştirer, yaradıcılık dadını kullanȇr. Rubayı insanın üstündä gördükçä, süreti vizual uurunda diiştirer yada tamannȇȇr.

«Bän görerim bu rubayı da annȇȇrım, ne ona etmeer, ne ona lääzım eklemää, ki olsun taa gözäl, taa uyumlu. Kişiyä bekim yaklaşacam da bir gözäl laf söleyecäm –rubanız sizä pek uymuş, gözälsiniz»,- söleer Evdokiya.   

İlk rubayı – fistanı insana,  Evdokiya 16 yaşında dikmiş.

«Bän 16 yaşındaydım, açan aldım o materiyayı fistan dikmää. Ozaman pek korkardım, ani bozaca. Materiya tam bir fistannıktı. Aldım bir prostina, onda istedim denemää. Bozarsam da sora materiyada çekedecäm yapmaa. Bobam dedi: — Diil, yapacan materiyada, neçin zerä sınaştırarsan elini yapmaa iki iştä, ozaman sana taa zor olacek. Ozaman bän yaptım, gözäl bir fistan oldu. Yıllar geçti, insannan buluştum, da o söledi, ani çok vakıt giimiş o fistanı»,- söleer Evdokiya. 

Terzilik zanaatı bizim kahramanımıza deyni – yaşamanın sevgili hem temel işi.

«Bana deyni terzilik verer eni ȇmoţiyaları gitmää ileri, brakmamaa, ne beenerim. Açan görerim, ani ruba isalää durȇr, isteerim yapmaa taa çok»,- söleer Evdokiya. 

Evdokiya Çebanova kendi kolekţiyasını  kurmaa  hem çalışmak odasını açmaa isteer.