Gagauziyanın anılmış jurnalisti Polina Barbova her keret kamera ardında bulunȇr. Verer soruşları, açıklȇȇr önemni olayları, annadȇr insannarın yaşamasını açıktan , götürer programaları. Ama büün o annadacȇk kendisi için. Jurnalistika uurunda çalışȇr 30 yıldan zeedä kazandı Gagauziyanın üüsek « Mihayıl Çakir» ordenını. Süjetımız onun için.
Gagauziya anılmış jurnalistin Polina Barbovanın ardında 30 yıl çalışmak jurnalistika uurunda. Süjetlar, intervyu, cannı yayınnar, bu vakıdın içindä diişärdilär tehnologiyalar, formatlar. Ama diişmedi en önemni- onun işi, angısı çekeder soruştan insannara hem esaba almak kıpımnarından herbir istoriyada, olayda.
«Mihayıl Çakir Ordenı»- Gagauziyanın en şannı ödüllerin birisi. Onu kablederlär Avtonomiyanın hem cümnenin ilerlemesi için. Büün bu ödül- insanda, angısı yıllarlan çalıştı gagauz dilin ilerlemesindä, kulturanın hem adetlerin çalışmasında kendi reportajlarında hem programalarında. Ama kadr ardında onun kendi yaşamak prinţipları var, angılarını o diiştirmeer yaşamanın süresindä.
Ödüllemäk momenti- pafossuz, ama yaptıkların esaba almaları, angıları sayılmȇȇrlar yıllarlan, ama yapılmış materiallarlan, programalarlan hem insannıklan. Üüsek notayı onun işinä koyȇrlar regionun kuvetleri hem cümnä.
Çoyuna Polina Barbova — diil sade jurnalist, ama vakıdın sesi. Söleerlär onun ii tarafları için, üüsek becermekleri için kendi yaradacılık yolunda. O buncak yıl götürer Allahın lafını siiredicilerä kendi programalarında, açıklȇȇr klisä kanonnarını, bibliyayı hem psaltırı uygun hem annaşılı dildä.
Polina Barbova söleer, ani jurnalistikada en önemni kaybetmemää meraklıı insannara, onnarın istoriyalarına, olmaa doorulukçu, açık ürekli, sevgiylän götürmää kendi işini. Nicä nışannadı Gagauziya Aksakallar nasaatı başı Vasiliy Arnaut — bu ödül — saymak onun işini bu yılların içindä.
30 yıl Polina Barbova annadȇr süjetların kahramannarın istoriyalarını. İnsannar, olaylar hem ecellär için. Da büün — onun kendi istoriyası olȇr kronilkaların bir payı, urgulȇȇr cümnä aktivisti Mihayıl Vlah.
İstoriyalar, angılarında var en önemni işlär- dooruluk, saygı hem sevgi kendi işinä. Da ilerdä var nasıl olsun taa diil bir süjet, angısında Polina Barbova verecek baş soruşu.