Üüsek tansion, baş acısı hem yufkalık — çoyu insannar esaba almȇȇrlar bu  simptomnarı. Ama maasuz hipertoniya sık-sık insultun sebebi olur — bu bir hastalıktır, angısında herbir  minut insanın yaşamasını kurtarȇr. Moldovada 10 merkez çalışêr, neredä insult hastalıınnnan insannara  ilk yardım veriler. Onnarın birisi Komratta, dolay  bolniţasında  çalışêr.

Komradın İnsult merkezindä paţientin yaşaması için güreşmää başlȇȇrlar paţient ilk minuttan bolniţaya geldiynän. Her gün doktorlar kan dolaşımının keskin bozulması için  insannara yardım ederlär — bu diagnozda vakıt pek önemni. Açan tansion  kontrol altından çıkȇr, insultun riski büüyer. Bölä olaylarda herbir minut esaba alınȇr, deer nevrolog doktoru Alla Harko: «İnsult—  vakıttan  baalı bir hastalıktır, bir laf var: vakıt bu imik. Herbir sekuntta  çok sayıda neyron öler, onun için yardım nekadar erken verilärsä, okadar taa ii olur. Bu yılkı kampaniyamızın sloganı: tanı, yardım et, vakıt önemliydir. İnsultun ilk simptomları görünärsä — üzündä  asimetriya, kollarda yada ayaklarda yufkalık, zorsa lafetmää— ozaman 112 numarasını arayıp yardım istemää lääzım»

Kardiolog Andrey Topal urguladı, tansionun  hem  vakıdında ilaçlanmak  var nicä  zor durumun  risklerini  azaltsın. 

«Arterial tansionu dünnedä insannarın baş öldürücüsüdür. Diil kendi tansion  belli eder insanın saalında , ama ondan  kalan zorluklar  hem  kan dolaşımının bozulması — insan  arasında insult deniler, koronar kan dolaşımının bozulması — bu da infarkt, böbreklerin zarar görmesi hem başka hastalıklar yaşamanın  kalitesini kötüleştirär. Onun için arterial tansionunu   vakıdında ilaçlamaa lääzım,  vakıdında danışmaa doktorlara. Evdä dä tansionunu  kontrol etmää lääzım»,- Andrey Topalov urguladı.  

Eni tehnologiyalar, uzmannar  24 saat çalışȇrlar hem  onnarın hızlı  hem açık  adımnarı  yardım ederlär doktorlara  başlamaa ilaçlamaa hastaları. Baş davaa— kan dolaşımını geeri getirmek hem insultun sonuçlarını indirmää.

«Bizim maasuz bir  erimiz  yok. Paţientları  bu binanın  kabul odasına getirilerlär. Burada kırmızı zona var, burada ilkin triaj geçirelär, paţientı  bakȇrlar, analizlär alınêr, sora başın KT-si yapılêr hem paţientin ilaçlamak  taktikası yapılȇr. Da rekanalizaţiya yada damar içi trombolizis yapmaa karar verilärsä, paţientı reanimaţiyaya geçirerlär hem proţedura orada yapılêr»,-  dedi doktor. 

Kimär keret insult insanda  görünmäz geçer. İnsan işä gider,  kendi işini yapȇr da annamȇȇr, ani  imik  korkunçlaa şüpelendirer . Çoyu bunu “mikroinsult” adlȇȇr  hem önem vermeer. Ama sessiz simptomlar da büük insultun habercisi olȇr. 

«Önemni faktorların arasında arterial gipertenziya, şeker hastalıı, şişmanlık, yaşamanın kalitesi, sigara içmäk, narkotik kullanılması girer. Bunnarlan  savaşmak lääzım, doktora danışmaa lääzım, gipotenziya terapiyasını lääzım geçmää. Şeker hastalıını ilaçlamaa lääzım. Ozaman insult riskları  bir tarafa alınȇrlar»,- Alla Harko söledi. 

Komrat insult merkezindä her gün göstererlär:vakıdında  yardım insanın yaşamını kurtarȇr hem onu normal yaşamaya geeri döndürer. En önemlisi — vakıt kaybetmemäk. Bu yıl Komrat, Çadır-Lunga hem Tarakliya dolaylarından  26 insana hızlı  yardım verildi. Geçän yıl 50 hastaya rekanalizaţiya yapıldı hem 30 paţient Kişinev bolniţalarına geçirildi.