Büün, çiçek ayın 27 — dä Moldovada bakılȇr Devlet bayrak günü — o suverenitetin, baamsızlıın hem milletin özelli simbolu sayılȇr. Yortu her yıl nışannanȇr çiçek ayın 27 — dä- gündä, açan 1990 — ci yılda trikolor ofiţial haberlendi nicä devletin bayramı.
Büün tamannandı 36 yıl, nicä kabledildi trikolor — devlet bayraa — nicä suverenitet, baamsızlık hem millet özelli simvolu. Bu üzerä Moldova devleti Prezidenti Maya Sandu danıştı yaşayannara:
«Devlet bayrak günündä biz aklımıza getireriz, ani hak kaldırmaa trikoloru kazanıldı girginniklän, insannar güreştilär millet için, istoriya doorulunu aslıya çıkarmaa. Bölä, herbir yapıda, herbir yolda, herbir parkta hem da herbir evdä, neredä o asılı, bayrak getirer bizim aklımıza onu, nekadar paalı bizim serbestliimiz. Ama en önemni hergünkü yaşamımızda o, ki koruyalım o paalılıkları, angıların simbolu bizim bayraamız oldu — yaşamaa birliktä, taa yakın olma biri — birimizä hem barabar çalışalım bizim Moldova devletinin gelecä için», — yazdı Prezident.
MD Premyer — ministrusu Aleksandru Muntänu hep ölä danıştı memleketin yaşayannarına.
«Bizim trikolorumuz gösterer umudu, güreşmeyi hem insannarın neetlerini. Onun istoriyası başlȇȇr 1989 — cu yılda hem da 1990 — ci yılın çiçek ayın 27 — dä onu sfinţit ettilär — bu oldu taa bir adım serbestlää hem baamsızlaa. Biz büün taşıyȇrız onu hodulluklan hem cevaplı», —yazdı MD Premyer — ministrusu.
MD Parlament öndercisi İgor Grosu pay aldı yortulu olaylarda barabar deputatlarlan hem da Hükümetin temsilcilerinnän.O nışannadı, ani trikolor birleştirer yaşayannarı.
«Bu bayrak için bizim dedelerimiz güreştilär, baamsızlık için. Zamandaş bizim davamız — düzmää geleceyi hem getirmää Moldovayı serbest hem ilerleyän devletlerin sırasına», — çizgiledi spiker.
Moldova devlet bayraa ofiţial karalandı 1990 — ci yılın çiçek ayın 27 — dä, ama 2010 — cu yılda sa bu data kabledildi, nicä millet yortusu.