Gagauz Erin uşak başçalarında 2015-ci yıldan beeri ANTEM programası giriştiriler. Küçük uşaklar zamandaş metodikalarına görä gagauz hem rumın dillerini üürenerlär.
«Programa faydalı, çünkü terbiedennerin dil kompetenţiyaları taa ii oldular», — açıklȇȇr Üüüretmäk bakannıı.
ANTEМ programasını «Moldova Evropa trenerleri» milli asoţiaţiyası kurdu. Bu komandanın başında asoţiaţiyanın öndericisi Luçiya Kuku bulunȇr. Geçennerdä Komradın №7-ci uşak başçasında, orta grupaların uşaklarına eni didaktika materialların prezentaţiyası geçti.
«Sevinerim, ani ANTEM programasına görä artık 80 didaktika materialı kuruldu. Da büün biz göreriz, nicä uşaklar gagauz hem rumın dillerini üürenerlär. Biz göreriz onnarın başarılarını. Esap alȇrız, nicä analar-bobalar da bu işä katılȇrlar. Butakım biz hem dilleri üürederiz hem dä halklarımızın kulruralarını koruyȇrız», — söledi ANTEM başı Luçiya Kuku.
«ANTEM programısına görä uşaklar interaktiv hem oyun metodların yardımınnan dilleri üürenerlär. Butakım üürenmäk hem dä üüretmäk proţesleri taa kolay hem meraklı olȇrlar», — açıkladı Komradın 7-ci uşak başçasının gagauz dili üüredicisi Olga Patraman.
Bu metodların faydası içi söledi hep bu kurumun rumın dili üüredicisi Natalya Nedälko da: «Uşaklar küçük yaştan dili üürenmää başlȇȇrlar hem dä oyun formasında bunu yapȇrlar. Onnar beenerlär bu proţesi. Sanȇrım, ani en önemni o, ki onnar bunu havezlän yapȇrlar».
Üüretmäk bakannıın baş uzmanı Lidiya Ostaş annattı, ani uşak başçaların izmetçileri burada multilingval ortamını kurȇrlar: «Uşak başçalarında gagauz hem rumın dilleri derslerindän kaarä türlü yortulu olaylar da geçirilerlär. Bu olaylara analar-bobalar da katılȇrlar. Butakım biz onnarı da gagauz hem rumın dillerindä uşaklarlan lafetmää havezlendireriz».
Üüretmäk bakannıı her yıl monitoringı geçirer, ki ANTEM programanın faydasını annamaa. 2023-2024 üürenmäk yılın sonuçlarına görä Gagauz Erin hepsi uşak başçalarının terbiedennerin 35% rumın dilini islää bilerlär. 39% dä gagauz dilindä üüsek kompetenţiyaları var.
ANTEM programasına görä didaktika materiallarını tiparlamaa deyni OBSE para verer hem dä Gagauz dilini kurtarmak fondundan paralar veriler.
Avtor: V. Çoban, operator: V.Kıssa, montaj: M.Kazaku