«Жизнь в эпоху перемен» kiyadın prezentaţiyası, angısının avtoru Komrat kasabasının yaşayanı, iş adamı Andrey Valkov, geçti KDU. Bu toplum doldurȇr hem enileder ilk kiyadı hep ölä adlan. O dünneyi gördüydü 8 yıl geeri.
Komrat kasabasının yaşayanın, iş adamın Valkov Andreyin «Жизнь в эпоху перемен” kiyadında avtorun avtobiografiyası gösterili. O annadȇr diil sade avtor için, ama açıklȇȇr onun düşünmeklerini yaşamanın maanası için, ne lääzım yapmaa, ki devletin hem regionun ekonomikası kalksın. Andrey Valkov nışannȇȇr, ani kiyat var nasıl türlü yaşlarda yaşayannarı meraklandırsın.
«Bu şansora gider başka tema, başka iş, ani geçti bu 8 yılın içindä. Bän şindi yaptım çok eni iş, eni düzmäk işlerini Komratta, eni yapılar gözäl, eni insan benimnän işleer. Onun için bän söleerim, ani bu eni kiyat. Da bän sanȇrım, ani insanın çoyu isteyecek onu okumaa»,- Andrey Valkov nışannȇȇr.
«Жизнь в эпоху перемен» kiyadın avtoru nışannȇȇr, ani bu kiyat kimi diişmeklärlän hem eniliklärlän dä biraz ilk kiyattan, angısı 2017-ci yılda tipardan çıktı ayırılȇr.
«Burada 70 proţent eni, 30 proţent da kaldı ilk kiyattan. Bunun için bän onda yaptım bu prezentaţiyayı. Olaydı başka, ani diişildi pak temalar, bän yapmaceydım. Ama bu kiyat eni. Bän vardı nicä iki kiyat yapayım, ama bir yaptım. Da onu okusunnar hem annasınnar naşey var bu kiyatta. Aramasınnar ilk kiyadı, sora da başka kiyadı. Bunun için ölä»,- Valkov nışannȇȇr.
«Жизнь в эпоху перемен» kiyat on ayın süresindä hazırlandı. Da bu zordu, ama meraklı işti, nışannadı Marina Levintiy, Andrey Valkovun yardımcısı.
«O yazardı kiyatta eldän. Verärdi bana, bän kompüterdä yazardım, verärdim ona, o okuyardı, beenmärdi, geeri çevirärdi. Bän genä yazardım, genä verärdim, da bölä biz on ay bu kiyadı yazdık. Bu kiyattan bän çok iş annadım Sovet Birlii için. Nicä yaşaardı bizim analar- bobalar, nicä geçti onnarın yaşamaları, nicä onnar işledilär, nicä büüdülär. Gençlerä var nicä söleyim, ani bu kiyat çok meraklı olacek onnara, neçinki onnar okuyarsaydılar bu kiyadı, çok iş kendilerinä çıkaraceklar bu kiyattan»,- nışannadı Marina Levintiy.
Bu kiyat meraklı olacek studentlerä, üüredicilerä hem hepsinä, kimin canı acıyȇr avtonomiya için, ekledi KDU rektoru Sergey Zahariya: «Sanȇrım, ani bu akıllı işlär, angılarını yaptı Andrey Georgieviç, gençlerä örnek olacek. Nekadar taa önemni örneklär, nekadar taa gözäl yaşamaklar insannar için, kim geçirdi onu Gagauziyada hem Moldova içindä, sanȇrım, ani onnar gözäl bir örnek gençlerä, deyni insannarı bilsinnär, biri- birini tanısınnar hem da barabar Moldovayı hem Gagauziyayı bulsunnar bu dünneyin üzündä».
«Жизнь в эпоху перемен» kiyadın içindä çok patret var, avtor tiparlandı 500 ekzemplär .
Moldovanın hem Gagauziyanın en mekalı haberleri GRTnın Telegram kanalında!