Gagauz türkücüsü, peetçi Andrey Palik «Can ilacı» ilk şiir toplumunu tanıttı. Ona 57 peet girdi.
Gagauz türkücüsü, türkülerin avtoru hem peetçi Andrey Palik gagauz dilindä «Can ilacı» ilk yaradıcılık toplumunu çıkardı. Kiyat kiriliţada tiparlı, ona türlü temalara şiirlär girdilär.
«Şiir toplumunda küçüklük, ana-boba, Vatan, dostluk hem yaşamak için, sevgi temaları açıklanȇrlar. Onda benim yaşamam. Onu hazırladı Pötr Paşalı, Vitaliy Manjul hem Konstantin Keleş resimnedilär»,- nışannadı avtor.
«Can ilacı» toplumu gagauzların kulturasına deyni önemni olay, söleer Gagauziya Genel kultura bakanı Marina Semönova: «Andrey Palik – talantlı adam. O bizä, evlad boyuna deyni örnek. İnsan, angısında var nicä üürenmää kendi dilini, Vatanını sevmää».
Avtorun şiirleri insannarın üreklerindä käämil notalamayı buldular, söleerlär olayın musaafirleri.
«Bu nesä eni bizim peetçiliktä. Avtorun kendi bakışı, duyguları – bu da beni duygulandırdı, açan peetlerini okudum».
«Аndrey Kiriloviçlän yakın 4 yıla işleeriz. Proekttä o çizgi filmların personajlarını seslendirer. İnteligent hem talantlı adam. Kutlȇȇrım kiyadın çıkmasınnan».
«Bu kiyattan kaarä, Andreyin var taa bölä iki kiyada yazılı şiirleri. Bizim yaşamamız onun şiirlerindä açıklanȇr».
Andrey Kiriloviçin laflarına görä, «Can ilacı» şiir toplulumuna var olan peetelrin sade 3-cü payı girdi. Kolverim 300 ȇkzemplärlän tiparlandı. Onnarın bir payı Gagauziyanın genel kultura bakannıına verilecek.
Moldovanın hem Gagauziyanın en mekalı haberleri GRTnın Telegram kanalında!