Resimci A.İvarlak «Grafika hem boyalı bez» katalogunu tanıttı. Prezentaţiya komratta Resim galereyasında geçti. Bu olay resimcinin 80-inci yıldönümünä adalı. Katalogta toplu İvarlak Andreyin en uygun yaratmaları. Burada belli nicä yıllar geçtikçä diişmiş avtorun beceriklii, üüselmiş resimcilik kolaylıkları.
Andrey İvarlaan «Grafika hem natura resimcilii» eni katalogu –unikal kolverim, angısı kilimnär koraflarını, grafikayı, naturadan yazmayı, avtorun patret arhivi topladı. Kiyada hep ölä resimci için biografiya hem bir statya onun için girdilär.
«Bän pek sevinerim bu günä. Kiyatta benim hepsi yaratmalarım grafika, manzara tarafından»,- dedi resimci.
Katalog- kiyat onnara, kim millet kilimnerin koraflarınnan, natura yazmasınnan hem grafikaylan meraklanȇr. Kolverim adalı, nicä profesionallara, ölä da zamandaş incäzanaatını sevennerä.
«Andrey cuvapçı sekretari Nasaatta. Uzun bir yol yaşamakta hem resimciliktä geçti. Hep korkardı, ani etiştirämeyecek kiyadını çıkarmaa, ama yaptı»,- nışannadı resimci Ayoglu.
«Andrey Dmitrieviç incä üzlü insannardan, ani çaarılmadık gitmeyecek. O insanca. Sever zaametini, işini»,- çizgiledi Petri Çebotar.
Аndrey Dmitrieviç İvarlak – gagauz resimcisi. Duudu 1943 yılda Komratta. 1974 yılda Kişinövda Repin adına Resim uçilişçesini başardı. Çok yıl Komradın kilim fabrikasında işledi , 200 kilim ȇskizını yaptı. Resimcinin resimnerin temaları başkalanȇrlar. Onnarda usta dolay dünneyi, duuma erini, gagauz halkın yaşamasını, istoriyasını, adetlerini gösterer.
