Komrat kasabasının 8-ci uşak başçasında Gagauziyanın kuruluşuna adalı yortulu olay geçti. Üürenicilär üüredicilerinnän birliktä sevgilerini ana taraflarına açıkladılar. Katıldılar bu olaya Gagauziyanın öndericileri dä.
Uşaklar gimnı çaldılar, halk türkülerini çaldılar hem halk oyunnarını oynadılar. Gagauzça şiir annattılar, andırarak ana dilinin hem ana tarafının gözelliini.
Uşaklar «Kadınca» halk oyunu oynadılar. Hep ölä ilerki vakıtlarda kullanılan «Fırıncı» hem «Düşür kalpaa» oyunnarın kurallarını açıkladılar. Butakım terbiedicilerin çalışmalarınnan evlad boyların hem kultura varlıının aralarında kaavi baalantılar olȇrlar.
«Uşaklar bu yortuyu severlär. Onnar türkü çalȇlar. Şiir annadȇrlar»,- Komradın 8-ci uşak başçasının terbiedicisi Polina Radova söledi.
Gagauz Erin başkanı Evgeniya Guţul şükür etti uşak başçasının çalışannarını zaametleri için. Hep ölä o açıkladı kendi mayılıını, ani uşaklar gagauz dilindä lafederlär hem adetleri bilerlär.
«Yaşasın bizim Gagauziyamız. Yaşasınnar uşaklarımız. İleri dooru da bölä götürünüz işinizi, nicä büün. Bän pek beendim»,- nışannadı başkan.
GHT spikeri D.Konstantinov söledi, ani avtonomiya dooru yoldan gider, çünkü bu küçük yaşta uşaklar gagauz halkın istoriyasını artık üürenerlär.
«Gençlerin ellerinä Gagauziyamızı brakacȇz. Sevinerim, ani onnar büün gagauzça lafederlär»,- GHT spikeri söledi.
Türkiyenin Genel Konsulu Komratta A.Hayal kutladı yortuya katılannarı avtonomiyanın duuma gününnän hem diledi, ki Gagauz Eri ilerlesin.
«Bu ufaklıkları çok severim. Çok sevimni çocuklar. Yıldönümünüzü kutlȇȇrım. İlerdä çok başarılı yıllar beklesinnär»,- çizgiledi Türkiyenin Genel Konsulu Komratta.
Valentina Çebanova büük havezlän siiretti, nicä onun kızı Mariya bu yortuda pay alȇr. O seviner, ani uşaan var havezi gagauz dilini üürenmää.
«Sevinerim, ani dilimiz unudulmȇȇr. Sevinerim, ani dilimiz ilerleer»,- nışannadı Valentina.
Komrat kasabasının 8-ci uşak başçasında geçirilän yortu taa bir keret gösterdi, ani önemni uşakları Ana topraanı sevmää üüretmää.
