Lüdmila Pоkrovskaya — Ana dilimizin akına kooruyucusu, bu gün, mart ayın 18-dä 100 yaşını tamannayacȇydı. Bu insanı, onun yaptıklarının anmaa deyni Beşalma küüyündä tombarlak masa geçti. Toplandılar bilimcilär, kultura zaametçileri, üüredicilär hem üürenicilär. Onnar hatırlan andılar Pоkrovskaya Lüdmilayı andılar.
Lüdmila Aleksandrovna — gagauz dilinin aaraştırcısıydı, yazımız kurulsun deyni çok çalıştıydı. Büün dä onun kiyatlarına görä okullarda, üüsek üüretim kurumnarında üürenicilär hem studentlär üürenerlär. Lüdmilä Aleksandrovna gagauz yazısının temelini koydu. Onun hatırınnan yazı dilimiz ilerledi. Lüdmilä Aleksandrovnayı bilennär söleerlär, ani o bitkiyadan kendisini işinä adamış. Ani çoyuna deyni bu uurda örnek olmuş: örnek — nicä sevmää işini, örnek — nicä becermää işini kaliteli yapmaa, örnek — nicä cümneyä faydalı olmaa.
«Оnu Allaa yolladı bizä. Kim biler nesoy olacȇydı bizim gagauz dilimiz hem gagauz kulturamız türk dillerinin aarasında. O yaptı hepsini ne yapabildi»,- nışannadı Lüdmila Marin.
1953-cü yılda kandidat disertaţiyasını koruyȇr. «Gagauzların türkü yaradıcılıı». Bu ilk bölä büük aaraştırmak, bilim işi, neredä gagauzların folkloru gösterili. Maasuz ozaman belli oldu, ani Lüdmila Aleksandrovna sade dili aaraştırmȇȇr, ama o gagauz dilinin gözelliini, unikal olmasını bütün dünneyä açıklȇȇr.
«O geldi Moskovadan taa 1948-ci yılda Beşalma küüyünä da açtı dünneyä bizim halkımızı»,- söledi Mariya Kapaklı Mercanka.
Sevgisini gagauz dilinä hem gagauz halkına Lüdmila Aleksandrovna sadece kiyatlarda göstermedi. O herbir insana büük saygıylan danıştı, derdini annadı, yardımcı olmak için büük kuvet koydu. Büük dost Lüdmila Pokrovskaya D.Karaçobannan oldu. Ona muzeylän baali işleri ensemää yardım etti. Hep ölä gaguzlara respublikayı sora da avtonomiyayı kurmaa yardım etti.
«Büük şansım vardı tanışmaa bu insannan, bilmää onu. Çok iş ondan kendimä aldım» ,- ekledi Mercanka.
Lüdmila Aleksandrovna 2009-cda oktäbrinin 7-dä Sankt-Peterburgta geçindi. Onun külünü ikiyä pay ettilär. Bir payı Moskvada gömüldü. İkinci payı da Gagauz Yerindä – Beşalmada. Busoy taa saalıında kendisi Lüdmila Aleksandrovna istediydi. Bu gün, Pokrovskaya Lüdmilanın duuma günündä, onun mezarına Gagauz Erin öndercileri, bilimcilär, kultura zaametçileri gelip, çiçek koydular. Butakım onnar saygılarının Lüdmila Aleksandrovnaya gösterdilär.
Avtor: V. Çoban, operator: G.Stavilov, montaj: M.Kazaku
Moldovanın hem Gagauziyanın en mekalı haberleri GRTnın Telegram kanalında!