«Şindiki vakıt bolniţalarda var 201 generator şafk vermesi için. Onnarı kontrol ettilär, denedilär da onnar hazır şafk vermää eer elektroenergiyayı sündürärsäydilär»,- haberledi saalıı korumak ministrusu Alla Nemerenko.
Saalıı korumak ministrusu Alla Nemerenko nışannadı, ani elektrogeneratorların yardımınnan işleyeceklär medik kurumnarı, ama en ilkin o bölümnär neredä insanın yaşamalarını kurtarȇrlar – hızlı medik yardımı, hirurgiya, reanimaţiya, intensiv terapiya hem neonatal bölümneri.
«Lääzım nışannamaa, ani büük medik kurumnarında var 4-7 elektrik generatoru. Bolniţaların işi baalı olacek generatorların çalışmasına, ama en ilkin kabletmäk bölümü, reanimaţiya, neçinki onnar çok dizel yakacaa harcȇȇrlar da onnarın izmet etmesi en paalı»,- ekledi ministru.
Komrat dolay bolniţasının menecerı Nina Raylän nışannadı, ani ilaçlamak kurumunda var iki generator.
«Birisi bulunȇr bolniţanın teritoroiyasında. Onun kuvedi 500 kilovat. Ona baalanaceklar urgent yardımın izmeti, reanimaţiya hem hirurgiya bölümneri, operaţiya hem duudurtmak bölümneri. Pek önemni yaşamak için bölümnär avtomat sistemaya görä ekleneceklär eer şafkları sündürärsäydilär»,- söledi Raylän.
Nina Raylän urguladı, ani iki generator, angıları var bolniţada, işin sırasını ilerledeceklär, eer şafkları sündürärsäydilär.
