Leovo dolayında Kolibabovka küüyündä soţial problemaları çözmää çalışȇrlar, ki küü ilerlesin. Baş soruşlar, angıları küü kuvetlerin önündä durȇrlar, migraţiya hem infrastruktura ilerlemesi
Kolibabovka küüyü küçük, ama problemaları büük, çizgileer primar İvan İskimji. İnsan ama umudu kaybetmeer , kuvet bulȇr , ki yaşamak erini ilerletmää hem adetleri korumaa. Gelän vakıtta kuvetlär neetlenerlär bir sıra proekt giriştirmää, ki infrastrukturayı ilerletmää hem iş erlerini açmaa.
«Biz dostlukta yaşȇȇrız, işlemää becereriz. Biz umudu kaybetmeeriz. Umutlanȇrız, ani ii vakıtlar, angılarını bizä adȇȇlar, geleceklär. Umutlanȇrız, ani bizdä “Evropalı küü ” programasına görä su, gaz olacek, kaliteli yollar düzülecek, uşaklar geeri evä döneceklär. 50 % yaşayan Moldovadan aşırıya gittilär. Migraţiya bütün cümneyi daattı. İnsannar umutlanȇrlar, ani devlet yardım edärsä, yaşamak ii tarafa dönecek»,- küüyün primarı nışannadı.
Kolibabovka ilerlemäk yollarını aarȇr hem bundan kaare kendi kultura paalılıklarını korumaa çalışȇr. 82% yaşayan — bulgarlar. «Българи» küü kollektivi sık halk oyunnarınnan hem türkülerinnän yortulu olaylarda pay alȇrlar.
«Hererdä, nereryi gideriz, Bulgariyada, Tarakliyada, hererdän ii çalışmak , kultura hem bulgar adetlerin koruması için gramotalarımız var»,- dedi Domnika Borova, Kultura evin başı.
Bulgar adetlerin ilerlemesi Kolibabovka küüyünü kultura tarafından zenginneder. Burayı diil sade bulgarlar musaafirlää gelerlär. Musaafirlär için var maasuz simbol.
«Kim bizä geler, bu taraftan kendi istemeklerini yazȇr. Burada da monetaları brakȇrlar. Rumıniyadan, Almaniyadan, Bulgariyadan var»,- ekledi o.
Küüdä etnografiya muzeyi var. O bulgar göçmennerin yaşaması hem kulturası için annadȇr. Onnar bu küüyü 1911 yılında kurdular. Taa çoyu onnardan Tvardiţadan geldilär. Yaşayannar büün dä koruyȇrlar adetleri, angılarını evladlara da açıklȇȇrlar.
