Кirsovo küüyündä voleybol turniri geçti, angısı Çernobıl atom ȇlektrostanţiyasında tragediyayı yok edennerä adalıydı. Sport olayı Gagauziyanın dört yaşamak erindän komandaları birleştirdi.
Voleybol turniri Çernobıl belasına adandı, Kirsovo küüyündä 9-cu yıl sıravardı geçirildi. Вu yıl meydana komandalar Komrattan, Tomaydan, Çadır-Lungadan hem Kirsovdan çıktılar.
«Büün en ilk geçinmiş dostlarımızı anȇrız. Hem belli,ki gençlerimiz, angıları şindi pay alȇrlar turnirdä, bu olay için lääzım bilsinnär»,- söledi «Gagauziya çernobılţıları» CK başı Ȇmmanuil Velikov.
Dostlarımızı lääzım aklılarımızda tutmaa. Sport – o kolaylık birleşmää hem anmayı gençlerä vermää, avariyanın yok edilmesindä pay alan Födor Sulak sayȇr.
«Pek islää, ani anȇrız Çernobılin pay alannarını, bu gösterer, ani onnar üreklerimizdä yaşȇȇrlar. Bu bizi, çernobılţıları sevindirer»,- urguladı Födor Sulak.
Olaya çernobılţıların dul karıları da geldilär. Sport olayın kurucuları belli ettilär, ani onnarın katılması turnirin duyguluunu gösterdi.
«Saa olsun primariya, ani bizi unutmadılar,teklif ettilär».
«Unutmȇȇrlar kocalarımızı, saa olsunnar».
«Butakım adetlät yaşadılȇrlar, unudulmȇȇrlar».
Çernobılin kahramannarını anmaa voleybol turniri Kirsovo küüyündä hayırlı adet oldu. Sportçular diil taramak için katılȇrlar, ama anmaa o insannarı da, kim dünneyi yader katastrofasından kurtaradı, söledi primar Anna Hohlova: «Turnira her yıl Tomaydan, Çadır-Lungadan, Komrattan gelerlär. Anmaklar birleştirerlär».
Turnir evlad boylarını birleştirdi. Burada gençlär hem onnar, kim çok yıl voleybola oynȇȇrlar, söleer Tomay küüyün komandasının kapitanı Sergey Gargalık: «Genç olannar var, ani 10 da, 20 yıl da oynȇȇrlar. Veterannarımız pay alȇrlar, onnar da 72, 73 yaşında».
En büük pay alan 72 yaşında. İvan Nedov bir da turniri kaçırmȇȇr.
«50 yıl voleybola oynȇȇrım. Belli, ki sport birleştirer».
«Käämil turnir, angısı brakmȇȇr çernobılţıları unutmaa».
Anmak, sport hem birlik – sade bölä Kirsovoda andılar onnarı, kim kendi yaşamasınnan dünneyi yader korkunçluundan koruyardılar.
Moldovanın hem Gagauziyanın en mekalı haberleri GRTnın Telegram kanalında!