Geçän dinnenmäk günnerindä Komratta geçti 19-cu şahmata turniri Çavdarov Valentini anması için. Yarışmalarda pay aldılar yakın 60 sportçu Moldovanın çoyu dolaylarından, iki gruppada A hem B. İki günün süresindä uşaklar hem büüklär güreştilär diplomnar hem kuboklar için, hem hep ölä kaldırdılar kendi reytinglarını şahmatalarda.
Gagauziyanın regional şahmata hem şaşki okulunda geçti turnir, angısı topladı diil sade kaavi şahmatistleri, ama te onnarı da, kim yapȇr kendi ilk adımnarı bu sportta. Turnirin açılışında musaafirlär hem trenerlär nışannadılar bölä olayların önemniini. Uşaklar diil sade kazanȇrlar eni becermekleri, üürenerlär taa yakın konkurentlarını hem dostlaşȇrlar. Nicä nışannadı Rusiya kultura hem bilim merkezi başı Artöm Naumenkov, pek sevindirer, ani yıl-yıldan taa çok uşak geler Komrada pay almaa bu yarışmalarda, ki oynamaa hem kazanmaa priz erlerini.
«Bu işlär geçerlär insannara görä, angıları kendi işini severlär. Angıları bu işlän yanȇrlar, da isterlär ki şahmata sportu ilerlesin. Şahmata — bu en eski sportların birisi, önemni olimpik oyunu. Uşaklar — siz pay alıcılar bu sport uurunda»,- nışannadı Rusiya kultura hem bilim merkezi başı Artöm Naumenkov.
Regional şahmata-şaşki okulun başı İvan Velikoglo nışannadı, ani bu yıl, nicä da geçän yıllar, toplandılar kaavi sportçular da gösterdilär üüsek becermeklerini hem kaavi konkurenţiyayı, kazandılar puannarı da kaldırdılar kendi uurlarını.
«Siz bilersiniz, şahmatalarda diil herkeret olȇr birtürlü. Çıkışı var nasıl belli etsin bitki tur, ki çıkmaa deyni ilk yada ikinci erä. Bizim uşaklar pay alȇrlar üüsek uurda. Kimsä tarȇr, kimsä birtürlü sayılan oynȇȇr. Biz gideriz ileri bu yarışmalarda»,- İvan Velikoglo nışannadı.
Trenerlär, angıları getirdilär kendi sportçularını yarışmalara, naşnnȇȇrlar, ani turnir pek kaavi, çoyu uşaklar burada alȇrlar eni bilgileri, pay olȇrlar kendi becermeklerinnän.
«Pek ii turnir, açȇr kapuları herbir uşaklara, angısı çekeder sade, kimin var büük becermekleri. Da biz her keret sevineriz, geleriz pay almaa. Da umutlanȇrız, ani gelän sıra Gagauziya gelecek bizä Sinjireya»,- şahmata treneri, Sınjerey kasabasından Alla Kodrän nışannadı.
«Burada her keret bilmeersin, ne beklemää gençlerdän, onnar her yıl olȇrlar taa kaavi, onnarlan zorca oynamaa, ilerleerlär, da sän lääzım yıl- yıldan taa çok hazırlanasın, ki taratmamaa onnara da düşmemää kendi reytingında aşaa»,- şahmata treneri, Tiraspol kasabasından Sergey Gostev urguladı.
Nicä nışannadı trener Andrey Dimitroglo,9 dolaydan pay alȇrlar sportçular .
«Pek kaavi yarışmalar, ajiotaj var, uşaklar pek savaşȇrlar bu turnirlardan sora, angıları geçtilär Moldovada. Da bizim okul taradı 11 ödül. Hepsi isteer oynamaa ötää dooru»,- nışannadı Andrey Dimitroglo, trener.
Nicä nışannadılar sportçular , konkurenţiya yarışmalarda kaavi, soperniklär becerikli da çoyu onnarı tarayamȇȇrlar hepsi partiyaları sıradan.
«Geçer ii yarışmalar, soperniklär kaavi, ama hepsi savaşȇr taramaa. 4 oynadım 2,5 taradım».
«Biz oynadık 4 partiya, bän kazandım 2,5 puan. Birini tarattım, zerä düştü kaavi konkurent. Da bän yaptım yannışlık».
«Ajiotaj var, oynȇȇrlar kaavi konkurentlärlän, turnir pek ii. Var kiminnän oynamaa».
«Bana deyni çempionat geçer ii , konkurentlär kaavi, ii yarışmalar».
«Biz 9 partiya oynadık. Onnardan 6 taradım, üçünü tarattım. Güreşmäk kaaviydi».
«Yarışmalar geçtilär ii, bana deyni zordu taramaa, çünkü pay aldılar uşaklar başka türlü dolaylardan. Bän kazandım ilk eri, kaavi soperniklär».
Devlet turnirin taraycıları kendi yaş kategoriyalarında kablettilär diplomaları, kubokları hem para baaşışlarını, hep ölä Gagauziya şahmata federaţiya başından para baaşışlarını.
Moldovanın hem Gagauziyanın en mekalı haberleri GRTnın Telegram kanalında!