Bu yıl Gagauz radiosu tamannȇȇr 25 yıl, nicä o açıldı. Bu vakıdın içindä radiostanţiya oldu diil sade haber sızıntısı, ama gagauz halkın kulturasının, dilin hem adetlerin koruyucusu.
Gagauz radiosu ilk keret efirä çıktı may ayın 12-dä 2000-ci yılda. Ama bu olsun deyni çok iş birkaç ayın süresindä yapıldı: radiostudiya kuruldu, montaj, korespondetlar için odalar, lääzımnı tertiplär alındı, annattı radio eks-başı Mariya Parfönova. Bu işi yapmaa ona izin verdi Teleradiokompaniyanın eks-başın Lübov Kasım: «25 yıl geeri Lübov Kasım koydu benim önümä daavayı açmaa radioyu. Bän lääzımdı kendim kurayım smetayı. Netürlü olaceklar studiyalar. Lääzımdı türklärlän çalışım, neçinki onnar koyȇrlar şartları- netürlü camnar olsunnar, ne türlü ses lääzım konulsun. Biraz korkardım yapabilecäm mı bu işi. Çok insan yardımcı oldu. Ozaman diildi ilin FM radiosunu kurmaa da uydurmaa şartlara. Netürlü dünnä radiolar lääzım olsunnar».
İlk günnerdän radostanţiya aldı kendi üstünä davayı diil sade haberlemää, ama üüretmää, birleştirmää hem bakışları kurmaa üç dildä- rus, devlet hem gagauz. İlk yıllar efir sade birkaç saat sürtärdi gündä, ama yavaş-yavaş programaların sayısı hem kalitesi büüyärdi, tematika genişlenärdi, auditoriya zeedelenärdi, nışannadı Teleradiokompmaniya eks- başı Lübov Kasım: «Biz diil sade yayınlardık, ama kurardık iş erlerini hem da remont işlerinä katılardık, studiyaları donadardık. İsteerim nışannamaa, ani finans tarafından yardımcı oldu Türkiye devleti. Türk kolegalar yardım edärdilär yayınlamak tertipleri koymaa Komratta, Çadırda hem Valkaneşttä. Bunu kendimiz yapamaceydık. İsteerim şükür etmää kolegaları, hepsi 10-12 saat işlardılär barabar türk kolegalarlan. Hepsimiz barabardık da bunun için may ayın 12-si — bu önemni bir gün. Bu eni becermeklär, eni dostlar, angılarınnan biz profesional uurunda taa üüsek kalkınardık».
Ȇfirdä öterlär diil sade haberlär hem analitika, ama kultura, üüretim hem şennendirmäk programalar, annadȇrlar avtonomiyanın yaşayannarı.
«Gagauz radiosu hepbir ileri, düz yol».
«Taa büük temaları açınız, kaliteli kolverimneri yapınız ileri dooru. Fayda olsun hem sizä, hem başkasına».
«Bän adȇrım sizä iilik, lääzımnı iştä. Çok saalık. İşleyasiniz bollukta hem raatlıkta hem çok iiliklär».
Kendi hergünkü işinnän radio kolektivi çok zaamet koyȇr gagauz cümnesinin ilerlemesinä, nışannadı başkan işleri bakanı İvan Kolioglo, kutlarkan radio kolektivini 25-ci yıldönümünnän.
«İsteeriz Gagauziya önderciliin adından kutlamaa sizi bu günnän. Sizin kolektiviniz diil büük, ama onu işider bütün Gagauziya. Biz sevinmeliklän sizinnän barabar işleeriz. Biz havezlän paylaşȇrız sizinnän türlü haberlärlän. Da siz dooru hem açık onnarı insana açıklȇȇrsınız. Sizin yardımınnan yaşayannar taa haberlenmiş olȇrlar»,- İvan Kolioglo kutlarkan radio kolektivini.
Gagauz radiosu ilerleder kendi misiyasını, kalarak önemni bir baalantı evlad boyların arasında hem kultura köprü gibi baalȇr geçmiş adetleri zamandaş vakıtlan, nışanneȇȇrlar radio uzmannarı.Büün gagauz radiosu- o zamandaş mediaplatforma, angısı işleer diil sade efirdä, ama internettä dä. Programalar yakışıklı onlayn- formatında, ilerlener soţial sayfaları da, ne verer kolaylık kaplamaa taa büük auditoriyayı, angısına girer gagauz diasporası sınır aşırıdan.
Moldovanın hem Gagauziyanın en mekalı haberleri GRTnın Telegram kanalında!