İki günün süresindä Komratta geçti devlet uurunda boks turniri. Yarışmaklara geldi dokuz komanda bütün devlettän. Sparinglerin süresindä en kaavilär kalktılar şannı pyedestala.
Nicä söledi anılmış boksör Pötr Kvätkovskiy : «Sän taa vazgeçmediynän-senin şannı pyedestalını kimsä kaplamadı. Sän vazgeçmediynän-sendä taa var şans taramaa». Ölä uşaklarda da, angıları geldilär Komrada pay almaa devlet uurunda yarışmalarda. Onnar gösterdilär, neya üürendilär sınışlarda , ki göstermää kendi becermeklerini genç olannara. Da te onnar, kim taradı ringta, kalktılar şannı pyedestala. Yarışmakların açılışında Bakannık komiteti başı ilk yardımcısı İlya Uzun nışannadı bölä olayların geçirmesinin önemliini hem diledi hepsi pay alannara üüsek başarları.
«İstedim sölemää , ani bu turnir devlet uurunda , o üüsek yarışmaların önündä geçer, burada lääzım belli etmää en iileri. Büün siz lääzım gösteräsiniz gözäl düüşleri. Büün bizdä yok taratmış, sadece o sportçular, angıları tarȇȇrlar»,— İlya Uzun nışannadı.
Olayın saygılı musaafirdi Devlet Boks federaţiyası baş sekretari Anatoliy Kaygorodov, angısı nışannadı bölä uurda yarışmakların önemliini sportçulara deyni. Onnar burada kazanȇrlar becermek hem olȇrlar taa kaavi.
«Büün çocuklar denerlär kendi kuvetlerini , neçinki boksöra deyni — bu ii praktika . Bän dilerim onnara ii başarları , bu yardım eder onnara taa üüsek uura kalkmaa»,- Anatoliy Kaygorodov nışannadı.
Turnirin çeketmesindän ringta duyulardı ajiotaj , neçinki hepsi boksörlar savaşardılar ensemää kendi konkurentlarını. Trenerlerin laflarına görä , uşaklar hazır üüsek uurda.
Şerali Turgunov, Moldova Şannı treneri, nışannadı: «İlk sefer geçireriz turniri onun için, ki kaldırmaa sporcuların ustalıını . Saaol bizim musaafirlerä, angıları kablettilär teklifimizi , gelerlär pay olȇrlar bilgilärlän. Onnarsız bu turnir geçmeyeceydi».
Viktor Yalimov, boks treneri, nışannadı: «Herkeret var kiminnän işlemää, var kendi uşaklarımız, onara lääzım motivaţiya vermää, çekmää sporta, boksa, ki ileri dooru da olsun çıkışlar».
Anatoliy Pıka, Moldova Şannı treneri: «En önemni , ani çeketmäk var, da biz bileriz, ani Komratta hem Moldovada var ii boksörlar, genç olannar, masterlar».
İki günün içindä türlü yaş hem çeki kategoriyalarda sportçular gösterdilär kendi becermeklerini hem urguladılar önemliini pay almaa bölä yarışmaklarda.
«İlk bu becermek herbirimizä, buna görä sän olȇrsın taa kaavi. Kazanȇrsın kendinä ad».
«Bu günä biz hazırlandık bir ay, da bän umutlanȇrım, ani bizim komanda bekim hepsina taramayacek, ama birazı kazanacek ödül».
«Kendi kuvedimi bän notalȇrım ii, bän sayȇrım, ani düüşü tarayacam da kazanacam ilk eri. Konkurentların kuvetleri taa üüsek».
Yarışmaların çıkışlarına görä tarayıcılar kablettilär diplom hem ödül. Turnir oldu hazırlanmak gelecek yarışmaklara, angıları geçeceklär aprelin 1-4 dän büüklerin aralarında, hem mayın 5-10- dan sport okulların aralarında. Lääzım sölemää, ani üç sportçu Komrattan, angıları kazandılar üüsek erleri halklararası yarışmaklarda, kabledeceklär devlet stipendiyasını sayıda 16 bin 100 ley.
Avtor: Z. Kanţır, operator: S. Georgiev, montaj: A. Gerçu
Moldovanın hem Gagauziyanın en mekalı haberleri GRTnın Telegram kanalında!