Gagauziyanın en büük liţeylerin birisi nışannadı yıldönümünü. 60 yıl Tretyakov lițeyinä Komratta. Bilgilerin üüsek kalitesi hem binnän başaran, angıları aklında tutȇrlar kendi okulunu çok yıl geçtiynän. Übileylän kolektivi hem üürenicileri kutladı Gagauziya Başkanı.
60-cı yıldönümünü nışannadı Komrat kasabasının Tretyakov lițeyi — Gagauziyanın en büük üüretmäk kurumnarından birisi. Üüretim reformasınadan o bilinärdi, nicä beşinci şkola. Büün liţeydä iki smenada 876 üürenici üürener. Kaliteli hazırlanmak verer kolaylık başarannara her yıl vermää bakalavra ekzamennerini üüsek çıkışlarlan. Şansora on yıl liţeyin öndercisi Polina Pıntä. Da onun zaametinnän liţey sayılȇr en ii avtonomiyada.
«Yıl- yıldan bizdä üüseler, nicä kalitenin proţendi, ölä orta balı da. Bizim üürenicilär şansora üçüncü yıl sıravardır vererlär bakalavra ekzameni 100 proţendä. Da bu nicä üürenicilerin çıkışları, ölä üüredicilerin da, angıları kendi kuvedini koyȇrlar, ki bölä üüsek çıkışlar olsunnar»,- nışannadı liţeyin öndercisi Polina Pıntä.
Yıldönümünnän kolektivi hem üürenicileri kutladı Gagauziya Başkanı Evgeniya Guţul. O nışannadı, ani liţey gözäl hem islää. Adadı üüredicilerä hem üürenicilerä üüsek çıkışlara etişmää.
«Taa bir keret isteerim duva etmää liţeyä, üüredicilerä, üürenicilerä, ana- bobalara, ani onnarın uşakları üürenerlär burada – kısmet, saalık hem herbir üüredici, angısı verer bilgileri üürenicilerä hoşlansınnar kendi üürenicilärlän, onnar da gurur duysunnar, ani bölä insannar akıllı çıkȇr bu liţeydän»,- kutladı Gagauziya Başkanı Evgeniya Guţul.
Avtonomiyanın başı başladı liţeya televizoru hem verdi anmak gramotaları hem premiyaları en ii üüredicilerä. Ayırı bir momentlan oldu «Gagauziyanın şannı vatandaşı» adın verilmesi matematika üüredicisinä Tatyana Kalçişkovaya: «Bu verer hoşluk hem cuvaplık ilerletmää, fayda getirmää. O işleer bu üüretmek kurumunda 55 yıl, götürer matematika hem informatika predmetlerini. Tatyana Andreevna üüreder diil sade formulaları hem davaları uşaklar bilsinnär, ama terbieder uşaklarda harakteri hem inanı kendi kuvedinä.Buluşup o uşaklarlan, angıları diil pek islää matematikayı bilärdilar, ama onnar aklında tutȇrlar da söleerlär Zaman hayır olsun Tatyana Andreevna. Nicä sizin işleriniz, nicä kendini duyȇrsınız. Da bu gösterer, ani yaşamak diil boşuna».
Gagauziya üüretim bakannıın başı Nataliya Kristeva şükür etti kolektivi zaametlär için üüretim sistemasının ilerlemesindä hem adadı başarları onnarın ilerki işindä.
«Herbirinä, kim büün burada, bilerim, ani başkaları ikinci smenaya geleceklär herbirinä çok saaol hem iilderim başımı sizin işiniz için»,- Nataliya Kristeva kutladı.
Tretyakov liţeyindä çok infrastruktura hem üüretim proektlär yapıldılar. Liţeyin istoriyası ilerleer 60 yıldan sora.
Moldovanın hem Gagauziyanın en mekalı haberleriGRTnın Telegram kanalında!