Üüretim ministerlii uşak başçalarının işçilerinin sayısını belli etti. Burada rumın dili üüredicileri var, ama gagauz dili üüredicileri yok. Gagauz Eri uşak başçalarının üüredicileri hem öndercileri ministruya kiyat yazdılar, neredä açıkladılar, ani ana dili bu kurumnarda mutlak üürenilsin lääzım.
2025-ci yılın yanvarın 27-dä Üüüretim ministerlii uşak başçalarının işçilerinin sayısını belli etti. Gagauz dili üüredicileri bu sayıya alınmadılar. Bu karar avgustta kuvedä girecek. Büünkü gündä avtonomiyada 56 uşak başçasında 70 zeedä gagauz dili üüredicisi var. Er ministerliin kararı diişmärsä bu uzmannar işsiz var nasıl kalsınnar.
«Ministerlik belli eder, kaç uzman var nasıl olsun uşak başçasında. Er başka uzman lääzımsa, onnarı primariyalar işä alsınnar lääzım. Hep ölä primariya kendisi bu uzmannara ay paralarını ödesinnär lääzım. bölä söleer ministerlik»,- nışannȇȇr Kristeva.
Gagauz Eri uşak başçalarının üüredicileri hem öndercileri ministruya kiyat yazdılar, neredä açıkladılar, ani ana dili bu kurumnarda mutlak üürenilsin lääzım.
«Bizi bu haber şaştırdı. Nasıl ölä gagauz dili uşak başçalarımızda olmayacȇk. Bölä diil lääzım olsun. Biz buncak yıl dilimizi ilerletmää çalışȇrız» ,- çizgiledi Anna Kroytor, 9-cu yaslanın başı.
Gagauz Erindä 10 yıldan zeedä dual üüretmäk programası başarılı giriştiriler. Uşak başçalarında uşaklar rus hem devlet dillerini üürenerlär. Hem dä bu uurda kaliteli bilgileri var.
«Bizim uşaklarımız multilingval cümnedä yaşamaa hazır olȇrlar. Biz onnarı okula hazılȇȇrız. Temel koyȇrız. Onnar uşak başçasında gagauz dilini üürenmärsälär/ okulda onnara zor olacȇk».
Gagauz Eri üüretim bakannıın başı N.Kristeva söledi, ani bu problemanın çözümünü mutlak bulmaa lääzım.
«Biz lääzım yapalım ölä, ki uşak başçalarımızda gagauz dili ötää dooru da üürenilisin»,- açıkladı Kristeva.
Kongaz küüyü primarı M.Esir söledi, ani gagauz dili üürenicilerinä ay paralarını ödemää deyni bücettä para bulunacȇk. Ama bu kurumnarda düzdürtmäk işlerini olmayacȇk neylän yapmaa.
«Bän gagauz dilini bilerim, uşaklarımı üürettim, unukalarım da bilsinnär isteerim. Bu üzerä biz bu ay paralarını ödemää deyni para bulacȇz, ama infrastruktura proektleri ilerlämeyeceklär»,- Kongaz küüyü primarı Mihayıl Esir nışannadı.
Üüüretmäk bakannıı danışȇr Üüüretmäk ministerliinä, ki karara diişmeklär giriştirilsinnär da avtonomiyanın uşak başçalarında gagauz dili üürenilsin.
Moldovanın hem Gagauziyanın en mekalı haberleri GRTnın Telegram kanalında!