Muzika koleci Tvardiţa kasabasında üüreder studentleri iki bölümdä — horeografiya hem instrumental uurunda. Başarannar kablederlär iki diplom — onnarın olêr zanaatı hem bakalavra uuru. Taraklı kasabasında geçti iş erlerin yarmarkası — studentlär tanıştılar hem üürendilär neredä var nicä işlemää kolectan sora.
Nesoy düzmää karyerayı hem nered iş bulmaa — bu soruşlara cuvapları savaştılar bulmaa Ştefan Nägu adıma Tvardiţa kasabasında muzika kolecin studentleri iş erlerin yarmarkasında.bu olay topladı bu yılkı başarannarı hem kultura uzmannarını Taraklıdan hem Gagauziyada . Studentlär urguladılar, ani taa sık başladılar iş için düşünmää…
«Bu buluşmak pek faydalıydı, yardım eder bizä kendi bilgilerimixi hem bevermeklerimizi lääzımnı uura doorutmaa. Üüreneriz,nereyi var nica tas girmää üürenmää, ne yapmaa , çok meraklı oldu.saa olsunnar bu toplum için».
«Bän şükür ederim hepsini,kim hazırladı buluşmayı. Bizä pek faydalı oldu, üürendik neredä var nicä işlemää ilerletmää bulgar halkın adetlerini, onnarı lääzım korumaa, o bizim özelliimiz».
Yarmarkanın kurucuları umut ederlär,ani bölä buluşmaklar yardım edeciklär studentlara yapmaa ilk adımlarını onnarın zanaatında, iş verennärdä da var kolaylık almaa işä genç talantlı uzmannarı.
«Bän saerım, ani bu olay vefer kolaylık başarannara annamaa ne onnar isterlär, angı yolu almaa isterlär hem kendi becermeklerini dooru kullanmaa. Sanêrım,ani bölä buluşmaklar pek faydalı. Onnar çoyu taa düşünerlär. Umutlanêrım, ani biz görecez bizim başarannarı burada Moldovada bizim sţenalarımızda»,- dedi Alla Kara Tvardiţa kasabasının Muzika kolecı başı.
Taraklıya lääzım kultura uzmannarı, angıları kayıl işlemää hem ilerletmää kendi halkın kulturasını, çizgiledi Taraklı dolayın kultura bölümün başı Lüdmila Şebolenko: «Kulturaya uzmannar lääzım hep, diil sade gençlär, ama taa çok onnar, neçin ki gençlär neda eni getirerlär, taa büük yaştan uzmannar da vererlär lääzımnı temeli, onuştan bölä buluşmaklar lääzım geçirilsinnär her yıl».
«Düz – Avа» andamblinin başı Tatyana Şögoleva nışannadı,ani gagauz hem bulgar kulturaları pek zengin. Onuştan pek önemni bu Kultura vaarlıını korumaa.
«Gagauziyanın muzika okullarına lääzım uzmannar, ayırı onnar, kimin ivin büün laf gitti, Tvardiţa kasabanın Muzika koleci hazırlêêr uzmannarı halk instrumentlerindä, hen pek önemni,ani o instrumentlär angıları şindän sora kaybelerlär — gadulka, kaval,gayda. Onnar bizä pek lääzım, hemkim onnarı dirildecek, zadece gençlär»,- Şögoleva nışannadı.
Iş erlerin yarmarkasından sora Tvardiţa kasabanın Muzika kolecin studentleri gösterdilär kendi becermeklerini Taraklı kasabasının Kultura Evindä Mărţişor yortusunun konţertindä.
Avtor: A. Karapirä, operator hem montaj: L. Arfonos
Moldovanın hem Gagauziyanın en mekalı haberleri GRTnın Telegram kanalında!