S.Kuroglo adına gimnaziyasında infrastruktura proektleri giriştirilerlär. Bu üüretim kurumuna iş vizitinnän Gagauziya Başkanı E.Guţul hem Üüüretim bakannıın başı N.Kristeva geldilär. Onnar proektlerin giriştirilmesinnän tanıştılar hem netürlü işlär burada taa yapılsınnar lääzım üürendilär.
S.Kuroglo adına gimnaziyasında imäk yapmak odasında hem dä imäk malalrının tutmak için odalarında derindän düzdürtmäk işleri yapıldılar. Bu ilär başa çıksınnar deyni Gagauz Eri bücetindän paralar verildilär. Sayı 1 100 000 ley kurȇr. Hep ölä üüretim kurumun hepsi katlarında sanitar odalarını enilederlär. Proektin paayı — may 962 000 ley kurȇr. Paralar devlet hem Gagauz Eri bücetlerindän verildilär. Başkan hem bakannıın başı üüretmäk kabinetlerinä dä girdilär, neredä üürenicilär logopedlan hem yardımcı üüredicilärlän zanaatlanȇrlar gördülär. Gagauz dili hem literaturası kabinetindä dä duruklandılar. Burada onnar üürediciylän Arakelän Veraylan ana dili için lafettilär, nesoy onu koorumaa hem ilerletmää var nasıl soruşları açıkladılar.
«Şükür ederiz, ani geldiniz bizä. var kolayımız lafetmää ana dilimizdä. Biz severiz ana dilimizi. İsteeriz ilerlesin ana dilimiz»,- nışannadı üüredici.
Bulundu başkan üüretim kurumun muzeyindä dä. Onu burada 2008-ci yılda Vera Arakelän kurdu. Şindiki zaman bu muzeydä yakın 600 ȇksponat var. Burada gagauz halkın istoriyası hem adetleri korunȇr. Var anılmış insannar için dä türlü materiallar. Onnarın birisi gagauz ȇtnografı hem yazıcısı — S.S.Kuroglo. Onun adını bu üüretim kurumu taşıyȇr. Gimnaziyanın başı Anna Botoşan şükür etti avtonomiaynın öndericiliini yardım için hem söledi, ani ötää dooru da onnarın yardımı lääzım olacȇk, çünkü var taa türlü lääzımıklar. En yakında isıtmak sisteması diiştirilsin lääzım. Proekt için dokumentleri hazırlamaa artık başladılar. E.Guţul söledi, ani kuvetlär okullarda taa islää koşulları kurmaa çalışacȇklar.
«Taa var çok proektlär, angılarını biz lääzım yapalım. Bän pek beendim bu gimnaziyayı. Belli , ani var burada çorbacı, angısı savaşȇr, ki işlär islää gitsinnär»,- çizgiledi başkan.
Üüüretim bakannıın başı N.Kristeva üüsek notaladı bu üüretim kurumunun üüredicilerinin işini.
«Burada pek islää üüredicilär işleerlär. Onnar multilingval prinţiplerini üüretmäk proţesindä becerikli kullanȇrlar. Derslerdä gagauz, devlet, yabancı dillerini ilerletmäk için türlü kolaylıkları kullanȇrlar. Biz esap alȇrız, ani bu kolektivin ilerlemää hem dä taa başarılı olmaa havezi var hem ani onnar bölä olsun deyni kuvet koyȇrlar. Hep ölä bu gimnaziya gagauz dili uurunda geçirilän konkurslarda pay alȇrlar, başarılı olȇrlar»,- sayȇr Kristeva.
S.Kuroglo adına gimnaziyasında 307 üürenici üürener.
Moldovanın hem Gagauziyanın en mekalı haberleri GRTnın Telegram kanalında!