Çeşmäküüyündä üüsek uurda çalışêr muzika okulu hem Yaradıcılık evi. Burada iş vizitinnän bulundular Gagauziya başkanı Evgeniya Guţul hem Avtonomiya kultura bakanı Marina Semönova.
Çeşmäküüyündä uşakların küçük yaştan var kolaylıı açmaa kendi becermeklerini hem zanaatlanmaa en sevgili işlärlän. Burada çalışêr regionda tek küü muzika okulu, neredä üürenerlär uşaklar diil sade Çeşmäküüyündän, ama Tülü küüyündän da. Burada 40 uşak akordeon, fortepiano hem gitara klaslarında üürenerlär.
«Benim adım Yanul Mariya, 6-cı klastayım. Muzika okuluna geldim, benim kakumdan sora bana pek meraklı bu iş geldi, bän dä çekettim. Pek severim muzikayı. Pay alêrız üüredicimnän türlü konkurslarda. Alêrız erleri hem pek çok üüreneriz».
«Bän yakın bir yıl gelerim.Pek beenerim fortepiano».
«Bän severim muzikayı. Pek beenerim fortepianoda çalmaa, neçinki bu muzikayı bän kendim çalêrım».
Bitki birkaç yılın içindä muzika okulunda diişildi yısıtmak sisteması, düzüldülär sanitar odaları, alındılar eni muzika avadannıkları, haberledi muzika okulun başı Nataliya Levandovskaya: «Uşaklar gelerlär bizä pek büük havezlän, çünkü üürenerlar diil sade çalmaa, ama oynamaa da, ansambli dä, orada da çalêrlar.Bizim üüredicilär hepsi genç, herbir uşak onnarı sever hem geler islää keflän. Derslär geçerlär uşak — üüredici, 45 minut o bana, bän ona, üüreneriz ne lääzım».
Muzikadan kaarä uşaklar zanaatlanêrlar yaradıcılık evindä dä. Burada onnar oynêêrlar, resimnerlär, boyêrlar hem türlü gözellikleri yapêrlar kendi ellerinnän.
«Boyȇȇrlar, resimneerlär burada. Gipstan yapȇrlar türlü meraklı işleri, kilim dokuyȇȇrlar».
«Bän gipstan yapȇrım. Pek severim gelmää».
«Bän severim resimnemää, gipstan yapmaa neysä, hep ölä dä biz kilim dokuyȇȇrız».
Çeşmäküüyün muzika okuluna hem yaradıcılık evinä vizitlän geldilär Gagauziya başkanı Evgeniya Guţul hem Avtonomiyanın kultura bakanı Marina Semönova. «Bizim uşaklar en becerikli. Biz hep koyacez kuvet, ki ilerletmää üüretmäk hem kultura proektlerini, ki herbir uşaan olsun kolaylıı göstermää hem ilerletmää kendi talantını», — Evgeniya Guţulbuluşmakta nışannadı.
Çeşmä küüyün primarı Pötr Macar urguladı, ani uşaklar pek aktiv hem göstererlär üüsek başarları.
«Bizim uşaklar aktiv pay alêrlar türlü rayon, respublika yarışmalarında hem hep üüsek erleri kazanêrlar. Yaradıcılık evindä genç kollektiv. Var burada 11 bölüm. Biz hep onnarlan birliktä, yardım ederiz»,- Pötr Macar urguladı.
Avtonomiyanın kultura bakanı Marina Semönova çizgiledi, ani pek onemni yardım etmää hem ilerletmää uşakların yaradıcılık bilgilerini, çünkü onnar Gagauziyanın gelecää.
«Hep nışannȇȇrım, ani yıl- yıldan kultura uurunda zanaatlanan insannar çalışêrlar bütün ürektän. Muzika okulu da , Kultura evi dä, biblioteka da, muzey dä, zanaat evi dä, neredä uşaklar çalışêr, göreriz, ani bütün ürektän.Biz göreriz, ani herbir klasta uşaklar, çok uşak var. Angı odayı açmadık, uşaklar var. Akordeon işittik, fortepiano. Var nicä sade sevinelim, ani Çeşmä küüyündä yıl- yıldan bu iş sade ilerleer, uşaklar zanaatlanêrlar»,- Semönova çizgiledi .
Üüredicilerin, anaların-bobaların hem regionun kuvetlerin yardımınnan uşaklar yaradıcılık evindän pay alêrlar türlü konkurslarda da kazanȇrlar üüsek başarları.
Avtor: A. Karapirä, operator hem montaj: L. Arfonos