İnsannarın aaz finans uurunda bilgileri var. Bu büük problema devletlerin çoyunda. O köstek gibi olȇr finans panayırın hem ekonomikanın ilerlemsindä, sayȇrlar ekspertlär.
İnsannarın aaz bilgileri finans uurunda gösteriler finans plannarın kurmak iisiklerindä, paraların dooru toplamasında, türlü risklerin notalamasında hem finans malların hem izmetlerin kullanmasında. Bu getirer ona, ani vatandaşlar kabledämeerlär finans uurundan kararları da bu yavaşladȇr eni instrumentlerin giriştirmesini pensiya, sigortalamak, banka hem investiţiya sferalarında hem ekonomika büülmesinin potenţialını baskı altına koyȇr, nışannȇȇrlar ekspertlär. Bitki vakıt banka uzmannarı üüselderlär vatandaşların bilgilerini finans uurunda geçirip türlü olayları, nışannadı komerţiya bankaların birisinin başı Vitaliy Ţvätkov: «Bizim vatandaşların haberlemäk uuru büünkü gün üüsek. Onnar çok eni işleri üürenerlär nicä internetta, ölä televiziondan hem radiodan. Onnar sesleerlär hem taa cuvaplı olȇrlar kendi paralarına hem sayılarına. Taa çok bilgileri kablederlär kartaların kullanmasında. Bu baalı sade ona, ani taa ileri insan korkardı bunu yapmaa şindi onnar bunu düşünmekli yapȇrlar. Onnar bilerlär, nicä dooru kartaları kullanmaa hem nicä dooru ödemää».
Finans uurunda bilgilerini kabletmäk için banka uzmannarı olayları geçirerlär üürenicilär hem studentlär için. Onnara annadȇrlar, nicä hem ne türlü korkunçsuz kullanmaa ödemek araçlarını hem paraları, nışannadı Vitali Ţvätkov: «Akına, ani kişi, angısı girer büük yaşamaya taa bunu kullanmadı, da bölelerinä lääzım ön vermää, ki onnar yanılmasınnar. Sora da onnar sınaşacȇklar bu olaylara hem taa arif olacȇklar».
Finans uurunda bilgilerin kabletmesi verer kolaylık küçük biznesin gelişmesinä, neçinki finans bilgilär koruyȇrlar insannarı korkulardan da bu ilinneder açmaa kendi biznesını hem üüselder finans durumunu hem onun ilerlemesini.
