Bu gün, yanvar ayın 9-da, S.S.Kuroglo 85 yaşını tamannayaceydı. Onu büük hatırlan hem saygıylan anȇrız. Yaptıkları paasız! Stepan Stepanoviç — peetçi, yazıcı, bilimci, aaraştırıcı. Halkına bütün yaşamasını izmet etti, zengin varlıı bizä braktı. Komratta olan gimnaziyaların birisi onun adını taşıyȇr. Burada hem Gagauziyanın kalan üüretmäk kurumnarında Kuroglo Stepan Stepanovicä adalı derslär hem dä klastan dışı derslär geçirileceklär. Bu olayların baş neeti – bu adamın yaptıkları için evlad boylarına annatmaa, ki o tanınsın hem dä anılsın.
Stepan Stepanoviç istoriya doktoru, etnologiya uurunda uzman, anıldı diil sade kendi temel bilim işlerinnän gagauzların adetçä-yaşayış kulturasında, ama nicä özel hem talantlı gagauz yazıcısı da. Bütün yaşamasında o kendi gagauz halkına izmet etti, metederäk onu kendi yaratmalarında hem kulturasına meraklıı uyandırarak. Stepan Stepanoviç 10 yıl Moldova Bilim Akademiyasında gagauzologiya bölümün başı oldu. Bunun için bu gün derslerdä hem anmak olaylarında üürenicilerä annattılar.
«Hepsimiz kısmetliyiz, ani bizim aramızda bölä bir insan vardı. Uşaklar da bilerlär onun için kiyatlardan, kolverimnerdän. Şükür ederiz Allahı, ani tanıştık onunnan, lafettik onunnan»,- gagauz dili hem literaturası üüredicisi Vera Arakelän söledi.
Yaşamasının büük payını Stepan Stepanoviç kendi halkının kultura varlıının aaraştırmasına baaşladı. Bilimci hem aaraştırıcı olarak 100-dän zeedä bilim işinin avtoru oldu. Stepan Kuroglo biliner nicä peetçi dä. Kendi zaameti için kabletti “M.Eminesku” medalisini hem “Ordinul de onoare” devlet ödülünü.
Kendi halkının gerçek oolu — Stepan Stepanoviç yoktu nicä kalsın bir tarafta o olaylardan, angıları XX asirin 80-inci yıllarında başladılar. 80-inci yılların ortasında S.S. Kuroglo Moldaviyanın cümnä-politika işindä aktiv pay alȇr. Bu yıllarda, başka anılmış kultura zaametçilerinnän barabar, o «Gagauz Halkı» akıntısının başındaydı. Hep ozamannar Moldova Parlamentin deputatı seçildi. 1990-1994 yıllarda pay aldı millet kultura uurunda türlü kanon proektlerin hazılamasında, hem dä “Gagauziya (Gagauz Eri) özel hak statusu için” kanon proektin hazırlamasında hem kanonun kabletmesindä.
Gagauziya ATB-nın kurulmasının başında bulunan başka anılmış insannarlan – M.V. Maruneviç, S.M. Topal, M.V. Kendigelän h.b., barabar katıldı Evropa Nasaatın işinä.Bu adam çok yaptı Gagauziyanın kurulması için, gagauz halkın istoriyasının hem kultura varlıın üürenilmesi hem ilerlemesi için. Stepan Stepanoviç kendi aaraştırmalarını braktı gelän evlad boylarına.
«O ölä bir gagauz, ani duudu Ukrainada, ama çok zaamet etti, ki bizim halkımız üüsek uurlara çıksın»,- ekledi Vera Arakelän.
GRT-nın arhivlerindä videolar korunȇr. Burada Stepan Stepanovici göräbileriz, fikirlerini, düşünmeklerini işidäbileriz.
S.S. Kuroglo 2011 yılın iyun ayın 23-dä geçindi. O 71 yaşındaydı.
