Büük ayın 8-dä Komrat kasabası mezarlıında toplandılar bilim adamnarı, kuvet temsilcileri hem sıradan yaşayannar anmaa deyni gagauz liderini Topal Stepanı.
Büük ayın sekizi gagauz halkına deyni oldu ölä bir gün, açan herbiri aklısına getirer Topal Stepanın yaptıklarını gagauz halkına. Onun yaptıkları Gagauziyanın ilerlemesinä, dilin korunmasına paasız, nışannadı Gagauziya M.Maruneviç adına BAM başı İrina Konstantinova: «Elbet, bilimcilär, gençlär, hepsi insannar lääzım bilsinnär bu adamı hem hodullansınnar, çünkü bölä adam çok az duȇr Gagauziyamızda. Stepan Topalın ürää pek zengindi, pek sevärdi Gagauziyayı, sevärdi gagauz halkını, sevärdi gagauz dilini hem işläärdi onun için, ki hepsi gagauzların kendi Ana topraa olsun».
Stepan Topal gagauzların istoriyasına girdi nicä Avtonomiya kurulmasında önemni eri alan ilk prezident. Onun inanı, dooruluu hem ariflii yardım ettilär gagauz halkına zor yıllarda politika ortamında kendi devletliini kazanmaa, nışannadı Gagauziya bakannık Komitetin başın ikl yardımcısı İlya Uzun.
«Biz sizinnän büün kutlȇȇrız bizim ilk prezidentimizin 67-ci duuma yılını. O geçindi, geçindilär onun anası da, bobası da, ama saa olsunnar, ani duudurdular bizä bölä bir çocuk.O da korudu bu halkı»,- nışannadı İlya Uzun, Gagauziya Bakannık komiteti başın ilk yardımcısı.
Çoyuna deyni Stepan Topal diildi sade politik, ama haliz liderdi da, angısı herbir insan için düşünärdi. Onun izmeti evladlarımızın geleceenä kaavi temel oldu. Onun adı diveç kalacek istoriyamızda, nicä örnek kendi halkına izmet etmesi uurunda, nışannadı Gagauziya Dış işleri bakannıı başı yardımcısı Üriy Kuzneţov: «Büük gururlan bulunȇrım büün burada, gururlan burayı sizinnän geldim anmaa Topal Stepan adını. Stepan Topal istoriyayı çevirdi. Bän bilerim, ani okullarda, herbir gagauz hem moldovan aylesindä Stepan Topal adını uydurȇrlar bölä laflara nicä:ideya, birlik, aylä, inan, halk, devlet hem patriotizm. Eminim, ani bu insanı biz tutacez aklımızda asirlärlän. Hem yapacez hepsini, ki bzim uşaklarımız bilsinnän Avtonomiyanın kurulması istoriyasını».
Topal Stepan mezarına bu gün saygı simvolları-çiçeklär koyuldular. Burada bulunan insannar aklına getirdilär onun yaptıklarını kendi duuma eri için. Gagauz Respublikası viţe-prezidenti Pötr Buzadji nışannadı, ani onun adı diveç kalacek diil sade istoriya sayfalarında, ama yaşayannarın üreklerindä dä.
«Biz geldik bu taşa bu büük gündä , güç, ani o yok yanımızda. Nekadar biz işledik barabar onunnan bizdä herzaman birlik hem annaşmak vardı. Neredä yoktu annaşmak, o savaşırdı annaştırmaa hepsimizi , zerä dünnedä hepsi olȇr annaşıpta»,- Gagauz Respublikası viţe-prezidenti Pötr Buzdjı nışannadı.
Başarıldı olay susmak minudunnan. Gagauz halkı sayȇr hem aklısında tutȇr kendi liderinin adını, annadarak onun yaptıkları için evladlara da. Büük ayın 8-dä St. Mih.Topal tamannayaceydı kendi 87-ci yıldönümünü.
Avtor: А. Теrzi, operator: S. Kıssa, montaj: İ. Rezuneţ.