Gagauziya Yaşlı insannarın nasaatın temsilcileri koydular çiçekleri gagauz halkın liderın Topal Stepan Mihayloviçin anmak taşına.
Topal Stepan Mihayloviçin adı gagauz halkın istoriyasına bütündän girdi. Bütünnä onun yaşaması oldu örnek gibi, nicä lääzım kendi halkına izmet etmää, çizgilerdi Gagauziya Yaşlı insannar nasaatı öndercisi Vasiliy Arnaut, çizgileyip, ani Stepan Topal 8 yılın süresindä çalıştı barabar onnarlan Gagauziya Yaşlı insannar nasaatında.
«Büün, açan anılȇr Ayozlu Stepan, nicä Gagauziyada, ölä dä Moldova devletindä, biz Gagauziya Yaşlı insannarın nasaatın temsilcileri geldik koymaa çiçekleri bizim liderimizin Topal Stepan Mihayloviçin mezarına, angısı taşıyardı Büük Ayozun adını. Biz çok yılların süresindä çalıştık Topal Stepannan Gagauziya Yaşlı insannar nasaatında. Bän onu aklımda tutȇrım taa açan 24 yaşındaydım. O zaman Stepan Mihayloviç yol bakannıında çalışardı. O pek çok yaptı, ki bizim paalı erimiz, paalı topraamız ilerlesin»,- Gagauziya Yaşlı insannar nasaatı öndercisi Vasiliy Arnaut nışannadı.
«Bän uşak başçasında çalışardım, da biz her zaman annadardık evlat boylarımıza onun için. Annadardık, nesoy o her zaman insan için düşünärdi. Stepan Mihayloviç her zaman istärdi ilerletmää Gagauziyamızı, da onda pek islä bu iş oldu. Açan biz barabar çekettik onunnan Gagauziya Yaşlı insannar nasaatında barabar çalışmaa, onda en ilkti – nasıl insannar yaşȇȇrlar, Gagauziyanın ilerlemesi, da biz da bununnna zanaatlanardık».
«Stepan Mihayloviç Topal hem da Mihail Vasilyeviç Kendigelän Gagauziya Yaşlı insannar nasaatın kurucuları. Onnar pek islä bilärdilär te o insannarı, kim durdu Gagauz Erin kurulmasında, da ani onnar lääzım toplu olsunnan birerdä. Da açan o kuruldu da çeketti çalışmaa, biz her zaman seslärdik onu, nesoy taa soruşlar olaceklar. O bizi üürtedärdi çalışmaa gençlärlän».
«Bän titȇrım aklımda Stepan Mihayloviçi taa 1978 – ci yıldan, biz barabar çalıştık. Açan o gitti PDMK – 4 kurumundan, önedercilik görevindän, o zaman o bizä JİVPROM KURUMUNA geçti. Te bu günnerdän da taa ilersi dooru tanışardım Stepan Topallan. Açan 1990 – ci yılda bän «Gagauz halkı» akıntının başın yardımcısıydım, barabar güreşärdik, biz onunnan islä dosttuk».
«Stepan Mihayloviç Topal her zaman vardı, var hem da kalacek bizim üüreklerimizdä, nicä bir akıllı kafadar, nicä bir dost, angısı Gagauziya için güreşärdi, da her zaman bulardı nesoysa çıkış herbir peydalanmış durumdan, en zor durumnardan da. Pek cuvapçıydı, akıllı adamdı».
Stepan Mihayloviç Topal duudu büük ayın 8 – dä 1938 – cu yılda Komratta, olup edinci uşak çiftçi — Topal Mihail aylesindä, ilk Dünnä cengin pay alanında. 2018 – ci yılın sentäbrinin 29 – dä, 81 – ci yaşında, bu topraa gagauz halkın lideri Stepan Topal braktı.
