GHT geçtilär cümnä seslemekleri «Avcılık için hem Avcılık fondun koruması» kanonuna.
Cümnä seslemekleri süresindä GHT başın yardımcısı Georgiy Leyçu nışannadı, ani bu kanonu işledärken hem kabledärken esaba almadılar kimi özellikleri. Teklif edilän diişmeklär dä buna sebep oldular.
«Belli etmää millet avcılık hem regional avcılık fondlarını. Ayırmaa onnarı biri-birindän. Belli etmää avcılık fondlarının sınırlarını, alarak esaba Gagauziyanın sınırlarını»,- dedi viţe-spiker Georgiy Leyçu.
Avcılık fondların Gagauziya administrativ sınırlarına görä belli etmesi gerçeklener kanona görä hem Gagauziya kuvetlerininnän dä lääzım bakılsın, nışannadı GHT deputatı Nikolay Andruşoy.
«Burada sade bir daava, belli etmää Gagauziyanın sınırlarını. Ki onnar belli etsinnär dolayları hem avcılık sınırlarını Avtonomiyanın sınırlarına görä. Bizdä pek çok göl var, angıları, deyelim, yarısı Kazayakta, ikinci payı da Balabanda. Olmasın deyni dolaşıklık, lääzım sınırları belli etmää», — ekledi Andruşoy.
İşledilmiş hem teklif edilän diişmeklerin lääzımnıını nışannadı Gagauziya Çiftçi bakanı Sergey İbrişim: «Biz bu diişmekleri kablederiz, onnar pek önemni. Onnar vereceklär kolaylık avcılara informaţiyayı aralarında payetmää. Bu verecek kolaylık herbir avcı kurumuna belli etmää territoriyaları, angıları için onnar cuvap edeceklär hem işleyeceklär orada».
Kanona diişmeklerin işledilmesi hem teklifedilmesi pek önemni avcıların işinä deyni, nışannadı Gagauziya avcılar birliin öndercisi Valeriy Mitioglo: «Biz her yıl yol fonduna öderiz -sora buradan finanslar yolları düzmesi için gelerlär. Avcılık için ödeklär nesoy döneceklär».
Bu diişmeklär verileceklär bakılmaya Moldova kuvet temsilcilerinä.
Avtor: A. Terzi, operator: S. Georgiev, montaj: İ.Rezuneţ.