Kıran ayın 3 -dä MD Parlamentindä bakıldı durum energetika sektorunda. Cümnä seslemeklerini geçirdi Parlament ekonomika, büdcet hem finans herzamankı komisiyası. Oturuşa teklif edildilär ȇnergetika ministerliin, «Ȇnergokom» akţioner bölümün, Millet Energetika agenststvosunun hem «Moldovagaz» kurumnarın temsilcileri. Bakıldı soruş, angısı baalı gazın paasın üüselmesinnän.
Kıran ayın 1 — dän gazın paası üüseldi 27% -tän taa zeedä, da kurdu 16,74 ley bir kubometra için. Karar bunun için kabledildi Millet energetika agenstvosunnan kasım ayın 29 — da «Moldovagaz» akţioner bölümün istemesinä görä. Kurumun başın bir vakıda işini götüreni Vadim Çeban açıkladı, angı sebeplerä görä bu oldu.
«Biz söleeriz onun için, ani paalar yok nasıl ölä, nicä mayda kabledildi.Prognozlar kuruldular sayılardan, angıları oktäbr, noyabri hem da dekabr aylarından belli oldular. O zaman kuruldular birtürlü prognozlar, halezdän sa başka türlü oldu»,- dedi Vadim Çeban.
Millet energetika agentstvosu öndercisi Aleksey Taran haberledi, ani gazın paasını lääzımdı kaldırmaa, olmasınnar deyni büük finans harcamakları.
«Herlem kabledilmedilär hızlı hem operativ ölçülär, o zaman olaceydılar toplanmış borçlar, yada tarifin defiţiti. Başka risk sa kullanıcılar için. Biz gireceydık kış aylarına çok harcamaklarlan. Dekabr ayın bitkisindä biz vardı nasıl kabledelim, yakın 600 million ley taa zedä olaceydı. Onun için maasus lääzımdı karışmaa»,- Aleksey Taran haberledi .
Energetika ministrusu Viktor Parlikov nışannadı, ani ministerlik yapȇr hepsi lääzımnı adımnarı politika uurunda , hep ölä yardımcı olȇr, kompensaţiyalarlan kız zamanında, memleketin fukarä insannarına.
«Biz çalışȇrız normal paner mehanizmasına görä, angısı söleer, ani biz islä gaz satın alȇrız. Ȇnergetika ministerlii çalışmȇȇr gazın satın almasınnan — satın almȇȇr hem da satmȇȇr onu.Ȇnergetika ministerlii çalıştırȇr politikayı»,- söledi Parlikov.
Hep bu vakıt nışanandı, ani ilk iki kış zamanın ayları için gaz Moldova için satın alındı . «Moldovagaz» kurumu hazırlanȇr satın almaa gazı fevral hem mart ayları için.
«Biz geçtik her ay satın almaa strategiyasına, neçinki var nasıl peydalansınnar islä cümlelär. Ama bölä cümlelär yok nasıl peydalansınnar altı aydan taa ileri. En yakışıklı zamandı, bizim bakışımıza görä — iyül»,- nışannadı Çeban.
İleri dooru plana koyulu satın alma taa 78 million kubometra gaz fevral için hem da 85,4 million kubometra gaz mart için.
