Gagauz avtonomiyasının 30-cu yıldönümünä adalı resim sergisi K.Atatürk adına bibliotekasında açıldı. Yaratmalarını ȇkspoziţiyada Gagauziya resimcilär Birlii temsil etti.
Gagauz avtonomiyasının 30-cu yıldönümünä adalı sergi teklif eder musaafirleri avtonomiyanın natura köşelerini görmää resimcilik dünnesindän. Ȇkspoziţiya regionun çok taraflı kulturasını hem istoriyasını diri yazmasından açıklȇȇr.
«Еr resimcilik incäzanaatımız ilerlärsä, cümnemiz da kulturalı olacek»,- nışannadı Dmitriy Ayoglu,Gagauziya resimcilär Birliin azası.
Herbir yaratma, sergidä temsil edili, resimcilerin unikal bakışını regionun natura köşelerinä göstererlär. Yapılı onnar türlü tehnikalarda. Serginin yortulu açılışında yaradıcılık birliin temsilcileri işlerinnän paylaştılar.
«7 resim sergidä temsil ederim. Resimnär yaalı boyalarlan, akvarellän, kalemnän var. Tematika taa çok peyzajlar»,- Gagauziya resimcilär Birliin pay alanı Mihail Arabacı söledi.
«4 resimim naturadan yaratmalar. Onnarlan yaşamamı annadȇrım»,- nışannadı Andrey İvarlak, resimci.
Ȇkspoziţiyanın şannı musaafiri Türkiye devletin Komratta baş konsulu Adnan Hayal oldu.
«Siz resimcilär Birliin aynası.Hepsini, ne yaradȇrsınız, Gagauziya için yapȇrsınız, halkınıza adȇȇrsınız»,- çizgiledi Türkiye devletin Komratta Baş konsulu Adnan Hayal.
Kultura olayın musaafirleri kendi gözlerinnän gördülär, nicä istoriya hem incäzanaat birleşerlär.
«Resimnär — bizim yaşamamız, onnar moralimizi kaldırȇrlar. Nezaman da sergilerä gelmeyim, burada dinnenerim. Onnar yortu yapȇrlar».
Hepsi isteyennerä deyni, sergi bir ay işleyecek.
