Üüretmäk kurumnarında eni standartlara görä çalışmak programası Baurçi küüyün 1-ci uşak başçasında deindän remont işleri imäk bölümündä yapıldılar. Komunikaţiyalar, kufnä tertipleri – hepsi eni koyuldu.
Baurçi küüyün «Kirezçik» uşak başçasında remonttan sora imäk bölümü eni üürenmäk yılın çeketmesindän. Uzmannar vintiläţiya sistemasını, ȇlektrikayı enidän yaptılar.
«Bu yaslada imäk bölümünnän problemalardan kurtulamardık. ANSAnın istediklerinä görä, imäk bölümü şindiki sorumnara görä lääzımdı olsun. İmekleri tutmak odası, lüzgerletmäk sisteması hiç yoktu. Büün blokta işçilerä deyni yıkanmak için koşullar var. imekleri tutmak için maasuz odada bölüklär var»,- Baurçi küüyün primarı Sergey Tukan söleer.
Kufnä tedarlıkları, plita imekleri yapmak için, buz dolapları, bütündän zamandaş sanitar normalarına uyȇrlar, söleer yaslanın menedjeri Olga Tukan: «Duvarlar, erlär ştukaturitedli, plitka doz-dolaya koyulu. Eni tehnika, masalar, şindiki gaz plitkası alındı. Yısıtmak sisteması, santehnika geçirildilär. Eni skladlar yapıldılar».
Kufnenin enilenmiş odasında, malları tutmak içerindä büün var hepsi koşullar işçilerä deyni. İmeklerin kaliteleri için zavhoz hem iki aşçı cuvap ederlär.
«Bu rakovina yoktu. Ayırı imeklär için masalarımız yoktu. Hepsi bölüklär ayırı biri-birindän».
Üüretmäk kurumnarında sorumnu koşulları yapmak için proekti erindeki kuvetlär finansladılar. Küü nasaatı hem primariya bu uura 538 bin ley böldü.
«Baştan 538 bin ley verildiydi. Tenderin geçirilmesindän sora, proektin paayı 429 bin leyä indi. Obyekti kabledärkenä paayı ta biraz indi. Bütündän kufnenin hem imekleri tutmak bölümnerin sayısı 400 bin ley tuttu. Taa 100 bin ley da masaların hem buz dolabın edinmesinä harcandı»,- dedi primar.
İmäk bölüün enilenmesi oldu erindeki kuvetlerin hem uşak başçasının çalışannarın yardımınnan. Büün burada saalıklı imeklän 85 uşak doyurulȇr.
Avtor: S. Dimitroglo, operator: S. Georgiev, montaj: İ. Rezuneţ