Gagauz Erindä unikal bir proekt giriştiriler. «Çemrek film» animaţiya studiyası, TİKA agentstvosunun yardımınnan, gagauz dilindä hem gagauzlar için «Güneşä karşı» çizgi filmini kurȇr. Studiyanın YouTube-kanalında artık 10 seriya var. Avtonomiyanın uşak başçalarında bu çizgi filmnerini üüretmäk proţesinä aktiv giriştirerlär. Personajların yardımınnan küçük yaşta uşaklar eni lafları üürenerlär. Bizim çekim grupamız Komrat kasabasının №9 uşak başçasında bulundu. Sıradakı süjetimizdä anandacȇz hem gösterecez, nicä burada çizgi filmnerini kullanȇrlar.
Uşaklar sevinerlär, açan terbiedicilär onnara «Güneşä karşı» çizgi filmini derslerdä koşȇrlar. Kelepercii, Pirkucuu, Filçuyu hem başka kahramannarı onnar artık sevdilär. Siirederäk bu çizgi filmini, uşaklar gagauz dilini üürenerlär. Eni laflar akıllarında kalȇr. Yavaş-yavar onnarı sözlerinä giriştirerlär. Kimilerinä zor geler, başkalarına biraz taa kolay, ama iş ilerleer.
«En çok beenerim köpecci. O pek şen».
«Bän pek beenerim filmları gagauz dilindä. Onnar pek gözäl».
«Çizgi filmnerini bakarak, uşakların laf zebellii zenginneşer. Butakım “Güneşä karşı” çizgi filmi üüretmäk proţesin önemni bir payı olȇr. Bu faydalı haliz o uşaklara deyni, ani evdä ana-bobalarınnan gagauz dilindä lafetmeerlär», — söleer Komrat kasabasının №9 uşak başçasının gagauz dili üüredicisi Lüdmila Barladän.
«Uşaklar büük meraklıklan oturȇrlar, siirederlär. Bu çizgi filmnär pek şıralı, annayışlı hem onnarın yaş uurlarına görä. Biz onnarı kullanȇrız hem işimizin sırasında hem dä serbest vakıdımızda, oyun formatında»,- ekledi Brladän.
Üüredicinin laflarına görä «Güneşä karşı» çizgi filmi üüretmäk proţesini taa uygun hem kolay yapȇr. Uşaklar havezlän kahramannarın ardına eni lafları tekrarlȇȇrlar.
«Üüretmäk proţesinä deyni filmlar pek meraklı hem lääzımnı. Saa olsunnar koordinatorlar, ani bu işi başa çıkarmışlar. Bizim uşaklarımıza deyni bu pek faydalı. Burada türlü temalar açıklanılȇr»,- nışannadı üüredici.
Sıradan derslerdä uşaklar üüredicilerinnän birliktä eni bilgilerini kaavileştirerlär.
«Çemrek film» studiyasının başı V.Sibova çizgiledi, ani o hem onun komandası TİKA agentstvosunun yardımınnan kendi işini ilerlederlär. Eni seriyalar artık kurulȇrlar. Onnarın baş neeti — gagauz dilini korumaa hem onu ilerletmää.
