D.Karaçoban adına liţeyinä bu yıl 33 birinci klas üürenicisi yazıldı. Üüüretim kurumun öndericilii iki klas kurdu. Bu uşakların anaları-bobaları korkȇrlar, ani gelän yıla bu klasları bireri toplayacȇklar.
D.Karaçoban adına liţen öndericilii iki birinci klas kurmaa kararı aldı. Birisindä 16 üürenici, öbüründä dä — 17. 1 «А» klasın başı Svetlana Kara söleer, ani üürenicilär taa ilk gündän dostlaştılar hem hızlı üretmäk proţesinä alıştılar.
«Üürenicilerimiz dostluk baalantılarını artık kurdular. Esap aldınınz mı, nicä onnar sessiz işleerlär. Bizdä hergün bölä. Uşaklar annȇȇrlar, neredä bulunȇrlar hem ani burada üürenmää lääzm»,- Svetlana Kara söleer .
1 «B» klasın başı Tatayana Kiräkova söleer, ani onun bakışına görä liţeyin öndericilii pek dooru yaptı, ani iki birinci klas kurdu.
«Sayȇrım, ani dooru yaptılar. Çünkü kalabalık klaslarda hem üürediciyä zor işlemää, hem dä üürenicilerä zor geler eni temaları üürenmää, materialları aklında tutmaa. Halizdän, metodologiyaya görä 1 klasta 20-25 uşak olsun lääzım. Bizdä biraz taa aaz»,- Tatayana Kiräkova söleer .
1 «А» hem 1 «B» klaslarda üürenän uşakların anaları-bobaları umutlanȇrlar, ani bu şkolaya birinci klaslara taa birkaç uşak üürenmää gelecek, da bu klasları bireri toplamayacȇklar. «Biz istämeeriz ki bir klasta 33 üşak olsun. Ko 20 üürenici olsun. Ozaman hem uşaklarımıza, hem dä üüredicilerä taa islää olacȇk», — söleer ana İrina Karadjova.
«Eer herbir klasta 20 uşak toplanmarsa, ikinci klasa uşaklarımız geçtiynän, bu iki klası bir klasa toplayacȇklar. Bu üzerä lääzım taa birkaç uşak bu okula üürenmää gelsin»,- ekledi ana.
Üüürenicilerin anaları urgulȇȇrlar, ani pek islää, ki D.Karaçoban adına liţeyindä derslerdän sora da uşaklar vakıdı geçiräbilerlär. Onnar çizgileerlär, ani bu pek islää hem uygun haliz o analara-bobalara, kim geç vakıdadan işleer.
«Biz bu kolaylaa pek sevindik. İştän geç geleriz. Uşaklarımız sa avşamadan üüredicilerinnän, göz altında, evdeki işleri yapılı. Bu pek islää»,- nışannȇȇr İrina.
«Bu okulda pek islää üüredicilär işleerlär. Bundan kaarä bizim uşaklarımızı iki keret doyurȇrlar. Üülenädän hem üülendän sora. Biz, analar-bobalar, şükürlüyüz»,- sayȇr Zinaida.
D.Karaçoban adına liţeyindä 680 üürenici üürener. Klasları orta doluluu 26 üürenici kurȇr.
Avtor: V. Çoban, operator: V. Kıssa, montaj: A. Topal