Komrat kasabası M.Kemal Atatürk adına türk bibliotekasında Türkiye Devleti baamsızlıı gününü nışannadılar.
Türkiye Devleti baamsızlık günü her yıl oktäbri ayın 29-da nışannanȇr. 101 yıl geeri bu gün Mustafa Kemal Atatürk bütün dünneyä Türkiye Respublikası için bildirtti. Bu gün devletin Konstituțiyasına diișmeklär dä geliștirildilär. Yortu Komradın Mustafa Kemal Atatürk adına bibliotekasında devlet gimnasınnan başladı.
Mustafa Kemal Atatürk adına bibliotekasının öndercisi Vasilisa Tanasoglo nışannadı, ani Atatürk zamandaş Türkiyenin temelcisi. Onun yaptıkları devletin istoriyası sayfalarında diveç kalaceklar. Reformalar hem cümnenin modernizaţiyası zamandaş Türkiyenin temeli oldular.
«Mustafa Kemal Atatürk bütün yaşamasını milletinä çalıştı hem diil sade kendi milletinä. Mustafa Kemal Atatürk dünnedä başka türk halklarına da büük ilgiylän bakardı. O halkların arasında gagauzlar da vardı. Bu ilginin iki sebepi vardı:yabancı devletlerdä yaşayan türk halklarının ayakta kalması, asimiläţiyadan kurtulması hem türk halklarının Türkiyeyä getirilmesi. Mustafa Kemal Atatürktä gagauzlara ayırı sevgi vardı»,- nışannadı Tanasoglo.
M.Kemal Atatürk süreti büün dä devletin herbir yaşayanına hem bütün dünnenin liderlerinä örnek olȇr. Atatürk bütün dünneyä gösterdi, nesoy var nicä kurmaa kaavi hem baamsız devleti. Yortuda bulunan musaafirleri şükür etti Komratta Türkiye Devleti Genel Konsulu Adnan Hayal: «Mustafa Kemal Atatürk adını taşıyan bibliotekada bu önemni gündä bulunduumdan gurur duyȇrım. Şükür ederim bibliotekanın önderciliini hem çalışannarını, hepsi muusaafirleri, ani büünkü günün sevinmeliinnän bizimnän paylaştınız».
Türkiya Devletindä bu gündä devlet bayrakları serilerlär, devlet hem üürenmäk kurumnarında bu gün dinnenmäk günü sayılȇr. Herbir aylä bu önemni günü bakȇr.
Şükrü Baştürk Türkiye Devleti Uludaa Universiteti doktoru nışannadı : «Bu gün Türkiye Cumhurietindä en mutlu günnerindän olan oktäbrinin 29-dur. Baamsızlıımız kardaşlık duygusunnan kanatlandıımız bir gündür. Bu bayram her türkün, yaşlısından gencinä, kızından erkeenä, duusundan batısına kadar kullanılan büük bir gündür. Mustafa Kemal Atatürk dedii gibi cünhurietimiz yıllarca baamsızlıı duyan insannık gururu, işitlik ve yaşamak biçimidir. Genç Türkiye Cumhurieti genç eytim kadrolarıylan, üürenicilerinnän, bütün halkınnan örümüş hem ötää dooru da örüyäcektir».
Türkiye Devleti 101-ci yılına baalı Komradın M.K.Atatürk bibliotekasında yaratma yarışması geçirildi. Bu gözäl gündä onun tarayannarı hem pay alannarı diplomnarı hem ödülleri kablettilär.
