Moldovanın Üüretmäk ministerlii Üüretmäk kodeksinä diişmekleri giriştirmää neetlener. Kuvettä bulunan insannar isteerlär yapmaa ölä, ki üürenicilerin uroklarda telefonnarı kullanmaa hakları olmasın. Netürlü bu yapılacȇk hem ne bu iniţiativa için düşünerlär avtonomiyanın üüredicileri hem üürenicilerin anaları-bobaları açıklayacȇk Alöna Terzi.
Üürenmäk kurumnarında uroklarda mobil telefonnarın kullanmasını neetlenerlär zapetmää. Ministerlik işledecek kararı, angısına görä bu proţes gerçeklenecek hem uroklar zamanında telefonnarı tutmak erleri belli edileceklär. Bu kararlara görä üürenicilär mobil telefonnarını sade aralıklarda kullansınnar yakışacek. Eniliklär için kendi bakışını açıkladı G.Gaydarcı adına liţeyi rumun dili üüredicisi Kristina Kambur.
«Üüredici olarak kayılım telefonnarın uroklarda kullanmasının zapetmesininnän. Bu iştän uşakları vazgeçtirmää lääzım. Ki onnar kendileri işlesinnär, taa dikkat olsunnar hem taa aktıv düşünmää başlasınnar. Sayȇrım, ani bu ii bir karar»,- dedi Kristina Kambur.
Bölä düşüner ingiliz dili üüredicisi Aleksa Anna da.
«Pek bekleeriz bu kararı, çünkü uşaklar uroklarda işlämeerlär, telefonnarda oturȇrlar, onuştan pek bekleeriz. Kimär sıra biz dä uroklarda internedi kullanȇrız, ama uşaklar uroklarda internedä girip, dikkat olamȇȇrlar. Pek bekleeriz bu enilii»,- sayȇr Aleksa.
Telefonnarın uroklarda kullanmasının zapetmesini ana-bobalar da tutturȇrlar. Onnar umutlanȇrlar, ani bu iş verecek kolaylık uşaklara uroklarda taa dikkat olmaa hem taa üüsek uurda bilgileri kabletmää.
«Uşakların dikkatlıını uroklarda bişey diil lääzım bozsun. Ozaman uşak bilgileri kabledecek. Uroklardan sora telefonda otursunnar».
«Herbir iş için kendi vakıdı olsun lääzım. Eer üürenmää lääzımsaydı, telefon diil lääzım. Kalan vakıt ko kullansınnar telefonnarı».
«Uroklarda telefon engel eder. Urokta üüredici var, o temayı annadȇr, ama diil telefon, angısı uşaan dikkatlıını bozȇr».
«Bilersiniz mi, pek islää. Biz telefonsuz üürendik hem sayȇrım, ani bu ii bir iş olacek. Uşaklar taa dikkat olaceklar».
Reforma üüretmäk proţesin başarılı olmasına hem uşakların dikkatlıını uroklarda çekmeyä doorudulu. Ministerliktä nışannadılar, ani bu verecek kolaylık bütün devlettä üüretmenin kalitesini kaldırmaa.
Avtor: A. Terzi, montaj: İ. Rezuneţ