Gagauz güreşçilerin ensemesi K-1 Moldova çempionatında hem Evropa kuboonda gösterdi, ani bu sport çeşiti avtonomiyada ilerler. Bakmayarak ensemeklerä sportçular trenirovkaları geçirerlär hem hazırlanȇrlar başka sport olaylarına.
Gagauziyadan sportçu Nikolay Gaydarji ilk keret katıldı Moldova çempionatına da kazandı altın medaliyi. O bir yıldan zeedä karışık güreşmäklän zanaatlanȇr da neetlener, nicä dä onun arkadaşları, gitmää dünnä yarışmaklarına.
«Bana deyni yarışmaklar islää geçtilär. Bän duygylandım. İki düüş geçirdim, çok hazırlandım»,- nışannadı çempion.
Nicä nışannadı trener Andrey Sarandi, Nikolay — sportçu, angısında var büük neetlär. Devletin çempionatında o taradı hepsi düüşleri, brakmayıp şansları konkurentlara.
«Bän sayȇrım, ani Nikolay kendini islää gösterdi. Bu onun ilk Moldova çempionati. İlk kikboksing çempionatı. O 8 yaşında da onun yaşları için bu pek islää çıkışlar. Hep ölä o iki aftadan sora oldu Evropa kuboon çempionu. Moldova çempionatı ona yardım etti taramaa, da iki aftadan sora o Evropa kuboonda ilk eri aldı. Biz hodullanȇrız»,— dedi trener.
Devlet çempionatından hem Evropa kuboondan gagauz sportçuları getirdilär türlü medalileri. Ama en çok- altın. Trenerin laflarına görä Evropa kuboonda bizim sportçularımız buluştular güreşçilärlän Rusiyadan, Belarusiyadan, Almaniyadan, Kazahstandan. Gagauz harakterini onnar tatamidä gösteräbildilär.
«Güreş kızgın oldu. Diil herzaman ölä Moldova çempionatlarında olȇr. Ama bu sefer oldu. Vardı çocuklar, kim 4 güreş geçirdi, ki altın medaliyi kazanmaa. 3-4 güreş — bu zor yol altın medaliya. Çempionat üüsek uurda geçti. Bu olaya geldilar sportçular 20 devlettän. Vardılar güreşçilar Kazahstandan, Azerbaycandan, Bulgariyadan, Rumıniyadan, Vengriyadan, Almaniyadan, Belarusiyadan, Rusiyadan hem Ukrainadan. Hiç düşünmäzdik, ani bukadar devlettän geleceklär. Ama pek meraklı hepsi geçti. Çocuklar için pek islää becermeklerin pay etmei oldu neçin ki kimilerdä yoktu boks becermekleri sınır aşırıdan konkurentlärlän»,- ekledi Sarandi.
Kikboksörlar nışannadılar, ani “Oguzfayt” klubun komandası üüsek uurda kendi becermeklerini yarışmaklarda gösterdi da may hepsi ödülleri getirdilär. Kimsä kendi konkurentleri hepsi sparinglarda ensedi, kimä sä sıra geldi konkurenttan taa aşa kalmaa. Amma, nicä urguladıar sportçular, bu pek islää, da onnarı taa kaavi yapȇr.
«Bän islää güreştim. Bir konkurent vardı Rezinadan, başkası Kişnovdan. Bän onnarı ballara görä ensedim. Bana deyni zordu».
«Evropa kuboo üüsek uurda geçti. Üç güreş geçirdim. Konkurentlar Pridnestrovyedän Belarusiyadan hem Rumıniyadan vardılar».
«Evropa kuboonda iki keret ensedim, bir dä keret tarattım».
«Bir düüş ensedim, bir dä tarattım. Bendä kila etişmedi. Açan vardılar konkurentlar 30 kila aarlık kategoriyasında. Bän dä 26 kıla çekerim. Bän kilaların beterinä tarattım».
«Üç düüş geçirdim. Konkurentlar Kazahstandan, Pridnestrovyedän hem Rumıniyadan vardılar. Bän ensedim da oldum Evropa kuboon çempionu».
«Herbir sportçu kendiycesinä becerekli. Kendi devletlerdä onnar çempion. Bän hepsinnän güreştim da ensedim».
Klubun iki güreşçisi Födor Kazanji hem Stas Verbin şindi hazırlanȇrlar dünnä çempionatında. Ama genç sportçular hazırlanȇrlar muay – tay yarışmalarına. Nicä söledilär çocuklar, herbirindä kendi başarılmak formulası var, ama en önemni hergünkü trenirovkalar hem disţiplina.
