Onkologiya hastalıklarından güüs onkologiya hastalıı ilk erdä bulunȇr da hastaların sayısı yıl-yıldan zeedelener. Bunun için canavar ayı haberlendi nicä güüs onkologiya hastalıınnan güreşmäk ayı.
Her yıl Moldovada yakın bir bin karı hastalanȇr güüs onkologiya hastalıınnan hem onnarın sayısı büüyer. Onkolog Elena Epur haberledi, ani 2023-ci yılda Komratta belli edildi 23 kişi güüs onkologiya hastalıınnan. O nışannadı, ani şindi taa sık hastalanȇr genç karılar.
«Karılar taa ii kendilerini bakmaa çekettilär. Taa sık doktora gelmää başladılar, kendilerini baktırȇrlar . Da bunun için gözlediler şişlerin belli etmesi taa erken stadiyalarda. Disgormonal ilaçlaması vakıtçasına olȇr. Da bu hepsi iisilder güüs onkologiya hastalıın sayısını»,- dedi Elena Epur.
Güüs onkologiya hastalıı- dertlerin birisi, neredä efektiv kendibaşına diagnostikası. Karı var nasıl kendisi belli etsin güüs onkologiya hastalıın nışannarını, sayȇr onkolog.
«Eer nesoy sä eni nışannar peydalandılar, şişlär, deri rengi diişti, koltuk altında nesoy sa şişlär peydalandılar, lääızm bizä danışmaa, yada aylä doktora, yada ginekologa. Onnar kendi sırada doorudaceklar nereyi lääzım»,- nışannadı onkolog.
Profilaktika — bu en önemni kolaylık güüs onkologiya hastalıınnan güreşmesindä. Şindiki diagnostika metodları vererlär kolaylık belli etmää hastalıı taa erken, taa ilk nışannar yokkana, söler Elena Epur.
«İlkin karılar kendi saalıklarını baksınnar lääızm. Taa sık ginekologlara danışsınnar, neçin ki güüz onkologiyası — o disgormonal durumu, da baalı üüsek estrogen uurunnan kan içindä. Bunun için türlü şişlär da peydalanȇr. Ginekologlarda baktırmak önemni onnar için, kimin hısımnarı raklan hastaydılar»,- söledi onkolog.
Bir keret yılda lääzım gitmää onkologa. Ama en pek bunu lääzım yapsınnar onnar, kim şansora sayıda bulunȇr. Her ay karı lääzım kendi kendisini baksın, söleer Elena Epur. İlkin onkologiya hastalıklar kendilerini belli etmeerlär. Bunun için önemni herzaman baktırmaa kendini, neçin ki 90 % olaylarını var nasıl ilaçlamaa, eer onnar vakıtçasına belli edildilär, nışannȇȇrlar zanaatçılar.