Svetliy küüyündä kanalizaţiya geçirmesi proekti durguduldu. Onun başarılması için finanslar etmeer. Kuvet temsilcileri nışannȇȇrlar, ani bu proekt pek önemni, nicä yaşamak punktuna, ölä dä yaşayannara deyni.
Büünkü günädän kanalizaţiya sistemasınnan baalı proektin işlerin 80 %- gerçeklendi. Bunun için Svetliy küüyü «Deneviţa» komunal kurumun başı Oleg Makedonskiy haberledi. Ama eni sistemayı şansora yaşayannarın 30%- di kullanȇrlar.
«Sebep onda, ani̇ eni̇ koyulan sistema başarılmadı. Bundan kaarä, koyulmadılar suyu çekmäk stanţiyaları da, onnar bu suları paklamak stanţiyasına doorutsunnar lääzımdılar»,- nışannadı Makedonskiy.
Finansların etmemezlii peydalandı ondan, ani işleri gerçeklärken eni işlär peydalandılar. O.Makedonskiy nışannadı, ani «Европейское село-2» milli programası bu proekti başarmaa deyni ii bir kolaylık gibi oldu. Burada 10 mln. leylik grantaları kazanmaa vardı nicä, ama biz bu kolaylıı kullanmadık. Büün kanalizaţiya sistemasını kullanȇr agrokolec, uşak başçası hem okul.
«Burayı taa eklendilär o evlär, angıların aulları yanından genel trubalar geçerlär. En önemni, ani bu sular kendi başına akarak, nasos stanţiyasınadan etişeerlär. Burada koyulu taa bir stanţiya, angısı bu suları sora paklamak stanţiyasına doorudȇr. Küüyün üülen tarafına bu sistemaya eklenmäk için biz izin vermeeriz»,- ekledi o .
Svetliy küüyündä MD ekologiya fondun yardımınnan 17 mln. ley verildi 7 km kanalizaţiyanın yapmasına. Bundan kaarä satın alındılar nasos stanţiyaları hem paklamak stanţiyası. Erli kuvet temsilcileri nışannȇȇrlar, ani kanalizaţiya proekti yardım edecek küüyün sanitar durumunu doorutmaa hem küüylülerin yaşamak kalitesini kaldırmaa. Proektin başarılmasına ama taa 10 mln. ley lääzım.
Avtor: A.Terzi, montaj: А. Gerçu