11 kandidattan Prezident postuna bir dä toplamadı seslerin yarısını. İki aftadan sora ikinci tur olacek. Bu iş için haberledi MSK başı Anjelika Karaman. Öncä seslerin saymaklarına görä Maya Sanduda- 42,31 proţent, Aleksandr Stoyanogluda 26,07 proţent. Ama ne baalı konstituţiya referendumunnan konstituţiyaya diişilmeklerin giriştirmesi için da söledi 50,16%, yok 49,84%.
Seçimnär geçtilär, ayırmak bölümnär kapandılar. Bitki bölümnär kapandılar saat edidä sabaaylen büün Amerikada hem Kanadada. MSK oturuşunda belli oldular çıkışlar prezident seçimnerindä hem konstituţiya referendumunda. Anjela Karaman açıkladı birkaç yannışlık, angıları ses vermäk günündä razgedilär.
«Biz dün bütün günün süresindä haberlärdik, nicä seçimnär geçerlär. Ama taa sölediydik, nesoy yannışlıklar vardılar. Bu bületennerin patredä çıkarması, bületennerin bozması, ayırmak bölümündän çıkarması, yasak edilmiş agitaţiya, seçim plakatlar, ayırcıların getirmesi bölümnerä, ses vermäk hakın bozması. Butakım hepsi bu danışmaklar hem da haberlär yannışlıklar için MSK otçötlarında belli olaceklar hem da onnar Konstituţiya davasına verileceklär»,-annattı Karaman.
Prezident seçimneri hem referendum Moldovada geçmiş sayılȇrlar, neçin ki onnara katıldı ayırcıların üçüncü payı. MSK başı Anjela Karaman haberledi, ani insan aktiv seçimnerä çıktı. En aktiv oldular Dondüşen dolayında , 50,96 %. En küçük çıkmak uuru Basarabäska dolayında 39%. Ses vermäk için açıldı 2221 bölüm, angılarından 231 sınır aşırıda. İNS
«Öncä haberlerä görä ayırcıların 50,16%, angıları referenduma katıldılar, kayıl oldular Konstituţiyaya diişmeklerinnän, ama 49,84% kayıl olmadılar. Getirderiz aklınıza, ani referendum geçirilmiş sayılsın deyni, ona lääzım katılsın ayırcıların üçüncü payı. Kanon sayılȇr kabledilmiş eer onun için vatandaşların çoyu kendi sesini verecek, angıları referenduma katıldılar»,- ekledi MSK Anjela Karaman.
MSK Moldova devletin seçim kodeksinä görä 24 saadın içindä verecek Konstituţiya davasına hepsi toplanmış haberleri ses vermäk için hem belli edilmiş yannışlıklar için. Bu haberlerä görä konstituţiya davası on günün içindä kabledecek kararı çıkışlar için.
