Türkiye İşbirlii hem Koordinaţion Agenstvosu TİKA yardım etti Aydar küüyünä energiya uurunda proekti gerçeklemää.
Türkiye İşbirlii hem Koordinaţion Agenstvosu TİKA Gagauziya Aydar küüyü F.Angeli adına gimnaziyasının örtüsünä güneş energiyası panellerinin koyulmasını destekledi. Onnarın energiya verimnii 50 Kv.kurȇr. Bu verecek kolaylık üürenmäk kurumun hem küüyün başka önemni kurumnarının elektrik energiyası lääzımnıını kaplamaa, nışannadı küü başı İ.Kiosä.
«Bu güneş panelleri koyuldular bizim şkolanın örtüsündä, bu energiya daadılacek bizim cümnä obyektlerä-primȇriyamız, şkolamız, skvajinamız, sokak aydınnatmamız. Nasaat verecek karar kimä ilk hem kimä nekadar. O 50 kv. etecek hepsinä»,- nışannadı primar.
Aydar küüyü Kultura evin başı Valentina Kiosä nışannadı, ani bu proekt verecek kolaylık yısıtmak soruşunu kurumda çözmää.
«Bu pek önemni yardım bücetimizä, çünkü harçlar şafka pek büük. Okulda var imekleri hazırlamak odası, kompüter odası. Muzeydä durum başka, çünkü bizdä yısıtmak sistemasında problemalar var. Umutlanȇrız, ani bu elektrik energiyasınınnan biz bu problemayı çözecez»,- çizgiledi Valentina Kiosä.
Proekt yaşamak erin ilerlemesindä hem küülülerin yaşamak kalitesini üüseltmektä önemni rolü oynȇȇr, nışannadı primar.
«TİKA kurumuna isteerim çok saa olsunnar sölemää, Türkiyenin insannarına çok saa olsunnar söleerim. Bu onnarın parası. Yaptılar bizä bu proekti. Bän düşünerim, ani ötää dooru da bizim taa proektlerimiz olaceklar da biz barabar Aydar küüyü için çalışacez»,- ekledi İlyä Kiosä, küüyün primarı.
Proektin önemini yaşayannar da notaladılar.
«Çoktan bunu lääzımdılar yapsınnar. Bu proekt verecek kolaylık elektrik sistemasının ükünü indirmää hem finansları korutmaa»,- nışannadı küüyüdän yaşayan.
Proektin gerçeklenmesi süresindä küüyün gimnaziyasının örtüsündä 90 elektrik paneli TİKA agenstvosunun yardımınnan koyuldular. Onnar vereceklär kolaylık güneş energiyasını çekip elektrik energiyasına döndürmää.
Avtor: A.Terzi, operator: A.Glekov, montaj: A.Topal