«Bir damna sevgi…» gagauz yazıcısı Anku Boeva eni kiyadını tanıttı. Kiyadın baş teması — sevgi. Sevgi Ana tarafına, ana-bobana. Sevgi yaşamaya. Prezentaţiyada bulundular gagauz yazıcıları, peetçileri, bibliotekaların izmetçileri. Onnar üüsek notaladılar Boeva Anakanın yaratmalarını.
Yazıcı Anku Boeva Çöşmä küüyündä 1945 yılında duudu. Çok yıl bibliotekacı hem üüredici işledi, ama sevgi yaradıcılaa hem literaturaya herzaman canında yaşadı. Redaktorluk işindän başladı. 2009-cu yılda tipardan çıktı «Uzak yollarım. Seçmä yaratmalar» kiyadı. Burada N.Baboglunun seçmä yaratmaları topluydu. Bu kiyadı okuyucular sevdilär. Sora, 2018-ci yılda, Anku Boeva kendi yaratmalarını tiparladı. Dünneyi gördü onun ilk kiyadı — «Güllerim solmasın». Şindi dä ikinci kiyadı tiparlandı — «Bir damna sevgi…». Kendisi avtor söleer, ani onun en sevgili teması — sevgi.
«Sevgisiz yaşamak — baygın! Seversin toprakları, neredä yaşȇȇrsın, neredä duumuşun, ana-bobanı. Sevgi hererdä lääzım olsun. Sevgisiz bişey yapamayacan», — söleer Anku Boeva.
Gagauz yazıcısı Mariya Kapaklı (Mercanka) üüsek notaladı Boeva Ankanun talantını hem urguladı, ani o yaşamaya açık bakışlan hem derin duygularlan bakan bir insan.
«Pek gözäl, derin gagauz dili var. Te ikinci kiyadı çıkȇr. Nasaat ederim herbirinä okusunnar bu yaratmaları. Onnar pek faydalı. Onnarda var iilik. Çünkü avtor dünneyä ii üreklän, ii bakışlan bakȇr», — açıkladı Mariya Kapaklı (Mercanka).
«Bir damna sevgi…» kiyadının redaktoru — gagauz yazıcısı, peetçisi Petri Çebotar. O söledi, ani Anku Boeva becerikli bir laf ustası.
«Taa Anna Nikolaevnaylan tanıştıımız zaman duydum, ani o duygulu, içindän titirekli bir insan. Açan o annadardı N.İ.Baboglu için, nicä onnar yaşamışlar. Bän teklif ettim o bişey yazsın, zerä bän duyardım, ani buradan çıkacȇk nesä meraklı. Hem büün dä sayȇrım, ani Anna Nikolaevna bu iki annatmadan kaarä başka bişey yazmasa — “Güneşin içimdä kaldı” hem “Düşlerimä gel”, o hep okadar gagauz literaturasının istoriyasına gireceydi», — söledi Petri Çebotar.
Gagauz yazıcısı, peetçisi Todur Marinoglu üüsek notaladı Boeva Ankunun literatura uurunda becermeklerini: «Onun annatması N.İ.Baboglu için sayȇrım, ani şedevr. Başka bölä yok. Bölä yaratma siirek var gagauz literaturasında».
Gagauz Eri Kultura bakannıın başı M.Semönova söledi, ani «Çeşmäküüyü baaşladı avtonomiyaya çok talantlı hem anılmış insan» hem o hodullanȇr, ani bu insannarın birisi — Anku Boeva. M.Semönova baaşladı Anna Nikolaevnaya şalinka hem diledi, ki o taa çok yıl saalıkta hem ayakta olsun.
