MD imäk malları korumak agentstvosu haberleer, ani Moldovada sentäbrinin 25-dän 27-nädän uzmannar 7 olay kuş salgınınnan belli ettilär.
Kuş salgınınnan 7 olay Nisporen hem Edeneţ dolaylarında belli edildilär. Gagauziyada kuş salgınnıı olayları belli olmadılar, nışannadı Komrat Mallar koruması bakannıın baş inspektoru Andrey Kurka.
«2024-cü yılın yanvar ayın 3-dän Moldovada sayıya konuldu kuş salgınnın 79 olayı. Onnarın taa çoyu MD poyraz tarafında»,- nışannadı Adrey Kurka.
Ki karşı gelmemää olaylarlan, açan ev kuşları bu salgınnan uulaşȇrlar, lääzım birkaç kural bakmaa, nışannadı uzman.
«Kuşları herzaman lääzım islää bakmaa hem ii koşullarda tutmaa. İnfekţiya ev kuşlarına etişmesin deyni raţaları, kaazları tauklardan ayırı tutmaaa lääzım. Yakın domuz diil lääzım olsun. Kuşların eri islää kapalı lääzım olsun, ki orayı yaban kuşları girämesinnär»,- annattı Kurka.
Andrey Kurka annattı ev kuşların bu viruslan uulaşmak kolaylıkları için dä.
«Eer siz, yada bir kimsey ayledän avlanmaktan geldiysä, o da var nicä bu infekţiyayı ayakkabında getirsin, onuştan evä döndüynen dezinfekţiya yapmaa lääzım. Kuşu, angısını siz getirersiniz avlanmaktan, islää kaynadınız hem onun içindekilerini yokediniz, ama pek dikkat olunuz»,- ekledi Andrey Kurka.
Uzman nişannȇȇr, ani eer yaşayannar esap aldıysadılar kuşların halında diişmekleri, o saat uzmannara danışsınnar lääzım.
Avtor: A.Terzi, montaj: M.Kazaku.