Bitki vakıtlar insannar taa çok onlayn izmetleri kullanmaa başladılar. Türlü saytlarda onnar kendi ofiţial bilgilerini brakȇrlar. Poliţiya izmetçileri danışȇrlar vatandaşlara hem yalvarȇrlar, ki dikkatlı olsunnar hem kendi bilgilerini korusunnar.
Avtonomiyanın yaşayannarı onlayn-hırsızlık olaylarınnan taa sık karşı gelmää başladılar, haberledi Komrat Poliţiya inspektoratın aaraştırmak bölümün başı Vitaliy Terzi.
«Bu hırsızlıkların sayısı zeedelener. 2023-cü yılında 25 danışmak kablettik. Bu 92% taa zeedä, bakarak 2022-ci yılına. 2024-cı yılında onlayn-hırsızlıklarlan baalı 28 danışmak kablettik»,— nışannadı Vitaliy Terzi.
İnternetta eni shemalar peydalandılar. Hırsızlar insannarın banka kartalarının bilgilerini üürenerlär da insannarın paralarını kendi sayılarına geçirerlär. Bilgileri üürenmää deyni hırsızlar türlü saytları hem programaları kullanȇrlar, insannara SMS yollȇȇrlar, söleer Vitaliy Terzi.
«Banka kartalarından paraları çalmaa var nicä sadece ozaman, açan bu kartanın nomerini hem onun ardında yazılı olan kodu bilersin. Bu bilgileri kimseyä sölemää diil lääzım»,- ekledi o.
Komrat Poliţiya inspektoratın aaraştırmak bölümün başı Vitaliy Terzi avtonomiyanın yaşayannarına danıştı, dikkatlı olsunnar yalvardı.
«Kimseyä diil lääzım banka kartaların bilgilerini sölemää. Şüpeli saytlara, neredä adȇrlar, ani büük para kazanacȇniz diil lääzım girmää. Er birkimsey telefon aşırı sizin banka kartalarınızın bilgilerini üürenmää istärsä, mutlak baalantıyı kesiniz. Bundan sora kendi bankanıza danışınız»,- nasaat etti uzman.
«Er siz onlayn-hırsızlıınnan karşı geldiysäniz mutlak Poliţiya izmetinä danışınız. Uzmannarlan baalanmaa deyni 112 telefon nomerini kullanınız», — nasaat etti Komrat Poliţiya inspektoratın aaraştırmak bölümün başı.
Avtor: V.Çoban, P.Slavova, operator: S.Georgiev, montaj: A.Topal