Gagauziya Başkanı Guţul Evgeniya ödülledi Gagauziyanın kimi yaşayannarını, angıları kendi zanaatınınnan halka yıllar boyunca izmet ettilär.
Gagauziya Başkanı Guţul Evgeniya ödüllärlän nışannadı o insannarı, angılarının izmeti regionumuzun istoriyasını bir payı oldu. Yortulu atmosferada o Gagauziyanın ilerlemesinä kuvet koyan insannara ödülleri verdi. Üüredicilär, terbiedicilär, ekonomistlär, mehaniklär, Gagauziya kurulmasında bulunan insannar, kultura izmetçileri ödüllendilär “Gagauziya Başkanı hem HT ”ödüllerininnän hem “Mihail Çakir” ordeninnän. Herbiri onnardan Avtonomiyamızın hem devletimizin ilerlemesinä büük katkı koydu, nışannadı Gagauziya başkanı Guţul Evgeniya.
«Biliniz, ani biz sizdä varız hem biz yapacez hepsini, ki siz kuvetlär tarafından destek duyasınız. Saaolunuz, ani siz bizdä varsınız»,- nışannadı Gagauziya başkanı .
Çok yıllık izmet için halkına “Mihail Çakir” ordeninnän Beşalma küüyü D.Kara Çoban adına istoriya hem etnografiya Gagauz Milli muzeyi muzeografı Mariya Kapaklı ödüllendi.
«Elbetki, pek sevindim, ani benim izmetimi esaba aldılar. Bizä deyni ödül okadar önemni diil , nekadar önemni o iş, angısı için biz bütün yaşamamızı çalıştık. Bu ödül kuvet verer ötää dooru da halkımıza izmet etmää»,- nışannadı D.Kara Çoban adına istoriya hem etnografiya Gagauz Milli muzeyi muzeografı .
Sofya Haritova Tülüküüyün yaşayanı. Bütün yaşamasını uşakları terbietmeyä verdi. O «Gagauziya Başkanı hem HT» ödülünnän nışannandı.
«Bän şansora pensiyadayım, ama pek sevinerim, ani kuvetlär tarafından bukadar dikkatlık kablederiz. Pek sevindik bu işä»,- nışannandı terbiedici.
Ödüllenmiş yaşayannarın herbiri nışannandı diil sade zanaatında başarılar için, ama yaşamak görgüsü için da. Onnarın dayanıklıı, ariflii hem zanaatına sevgisi genç evladlara deyni büük örnek, nışannadı Evgeniya Guţul.
Avtor: A.Terzi, montaj: İ.Rezuneţ