Güz zamanı Moldovada salgınnan ulaşmak vakıdı, söleer mediklär. Moldovada bu virus her yıl binnän insan saalıklsızlaa getirer, çoyuna deyni salgınnan uşlaşmak büük problemaları açȇr, uzmannar söleerlär. Moldova sentäbrinin çeketmesindä 200 bin vakçına payını, söledi Cümnä saalıı koruma merkezin uzmanı Tatyana Dimoglo.
«Gagauziyaya 5280 aşı payı verildi. Коmrat dolayınına -2160 pay, Çadır-Lunga dolayınına — 1920 hem Valkaneş dolayınına -1200, nekadar da geçän yıl verildiydi»,- söledi Cümnä saalıı koruma merkezin uzmanı Tatyana Dimoglo.
Vakţına imuniteti kaavileder, güüdeyä viruslan yardım eder güreşmää, söleer Komradın saalık merkezin aylä doktorların bölümün başı Lübov Bargan.
«Bu vakţınayı viz geçän yıl koyduk, hayırlı kendisini götürdü. Umutlanȇrız, ani bu yıl da kaliteli olacek. Salgından aşılanan insannar ya hastalanmȇȇrlar, yada başka organnara zararsız hastalanȇrlar. Aşı göstermeer, ani insan 100%-dä hastalanmayacek salgınnan, o garantiya verer, ani güüdeyä başka hastalıkları getirmeyecek»,- söleer Lübov Bargan.
Salgındandan aşılanmaa önemli insannara, kim riskli bölümündä bulunȇr, çizgiledi Lübov Bargan.
«Paţientlär ar hastalıklarlan, VİÇ infekţiyasınnan, kim garmonal terapiyasını kableder, şeker diabetını çeker, kalip-damar sisteması hasta, oftigaylan hasta mutlaka aşılansınnar lääzım»,- çizgiledi Lübov Bargan.
Salgından aşı poliklinikalarda hem saalık merkezlerindä parasız koyȇrlar, onu var nicä kendi yaşamak erindä koydurmaa. Bunun için aylä doktoruna lääzım kayıllık kiyadını almaa, insanın yanında lääzım olsun erindeki dokumendi.
«Gelin aylä doktoruna da alın haberlemäk kiyadını, sora aşılamak odasında vakçınayı koydurun»,- çizgiledi Lübov Bargan.
Komradı yaşayannarı aşılamak kampaniyasının ilk günnerindän sezonnu salgın aşılamasını yaptırȇrlar.
«Geçän yıl koydurduydum aşı, salgınnan ulatıydım, ama ilin geçirdim. Düşündüm bu genä aşılanmaa».
«Seftä aşılandım geçän yıl, bir sıra da hastalanmadım. Bu yıl genä kararladım koydurmaa. Bu yıl aşılamak kampaniyası erken çeketti».
Komradın saalık merkezin doktorları aklımıza getirderlär aşılamanın önemlii için.
«Aşılamak-o şans salgınnan taa az hastalanmaa noyabri, dekabri, yanvar aylarında. Teklif ederim hepsi yaşayannarı aşılanmaa. Saalıkta kalmaa deyni taa bir adım birliktä yapalım».
Vakţınaţiyadan sora imunitet 2-3 aftanın içindä olgunnaşȇr, vakţınanın kuvedi 6 aydan bir yıladan sürter.
