Gagauziya Başkanı Evgeniya Guţul dolaştı Çadır kasabasının dolay bolniţasını. Orada, baş investiţiyaların yardımınnan medik kurumun imäk odası düzüldü.
Çadır kasabasının dolay bolniţasının imäk odasında otuz yıla yakın düzmäk işleri geçirilmedi. Aşçılar kötü koşullarda çalışardılar şindi, nışannȇȇr işçilär, var kolaylık raatlıkta çalışmaa.
«Şindi, pek kolay işlemää burada, pak, pençerelär, kapular, hepsi diişti, sevineräk geleriz işä.Şükür ederiz bizim direktoru, hepsini, ani bölä gözäl düzmäk işleri yaptılar, bizä deyni ii koşulları, çok saa ol deeriz onnara».
«Çok zordu işlemää, pençerelär, kapular eskiydi, yüflärdi hererdän. Şindi, diişti hepsi, pek gözäl. Bu takım kurumnardan üüsek uurda standartları sorȇrlar, şindi onnar hepsi var. Biz taa biraz tehnika alayacȇz, koşulları taa üüsek uura kaldırmaa lääzım».
Çadır muniţıpiyasının dolay bolniţasının başı Natalya Popazoglo annattı, ani çoktan vardı plannarda imäk odasında derindän remont yapmaa.
«Çoktan vardı soruş, ki geçirmää burada düzmäk işlerini. Onuştan, açan bizdä oldu kolaylık geçirmä o paraları, angıları verildi bizim bolniţaya, biz kararladık ölä, ani düzeçez imäk odasını, çünkü o kabinetlerin biri, neredä çoktan yapılmadı düzmäk işleri»,- Natalya Popazoglo annattı.
İi koşulları kurmaa işçilerä hem paţientlerä, o önemli her bir mediţina krumuna, çizgiledi Gagauziya saalık bakanı Edgar Dimov.
«Bän düşünerim, ani bu önemli, ki mediţina kurunmarı üüsek uurda işlesinnär. İnsannarı ii doyurmaa lääzım hem islää koşullarda onnara imä hazırlamaa. Bu iş önemli bir pay insannarın alıştırmasında tutȇr»,- dedi bakan.
Gagauziya Başkanı Evgeniya Guţul nışannadı, ani avtonomiya kuvetleri, her keret savaşȇrlar kurmaa Gagauziyanın yaşayannarına üüsek uurda koşulları.
«Bän isteerim sölemää, ani biz herzaman yardımcı olacȇz kuvedimizä görä. Her bir insana, olsun işçi bolniţada, olsun kim, ani saalık problemalarınnan burada, ani onnar zaman geçirincä burada, duysunnar bizim yardımı, ani biz her zaman, her bir insanın yanında», — çizgiledi başkan.
Bütün proektin paası Çadır dolay bolniţasının imäk odanın düzülmesi için tutȇr bir million leydän zeedä. Nica nişannadı bolniţanın başı Natalya Popazoglo, bolniţa her gün doyurȇr yakın 180 hastayı.
