Svetlıy küüyün kultura evindä remont işleri yapıldılar. Pençerelär hem kapular koyuldular, yapı dış yanından yısıdıldı, evin ţokoli döküldü. Yapılı işleri başkan Evgeniya Guţul gözletti.
İki ay geeri başarıldı işlär Svetlıy küüyün kultura evin dışyanından yısıdılmasında. Yapının ţokoli kaaviledildi, ţokol döküldü. Bu uura baş investiţiyalardan 1,5 mln. ley verildi.
«İşlär başarıldılar. İşlerä hem gözledici kurumun koşullarına 1 mln. 300 bin ley harcandı. 200 bin ley arttı»,- dedi Gagauziyanın düzücülük hem infrastruktura bakannıın başın bir vakıda işini yapan Sergey Bolgar.
Komunanın başı İvan Marçenko söleer, ani kultura evindä derindän remont işleri kurumun merkezindä hem saa tarafında yapıldılar. Ama önemli işleri taa lääzım yapmaa.
«Kultura evin saa tarafı içyanından 3 yıl geeri düzüldü. Sol taraf kötü durumda. Hererdä pençerelär hem kapular diiştirildilär hem örtü yapıldı, şindi içyanında taa remont işleri llääzım yapılsınnar»,- Komunanın başı İvan Marçenko nışannadı.
Kultura evindä düzücülük işleri 2016-cı yılda çekettilär. Yapının içindä ilk hem ikinci katların giriş odalarında işlär yapıldıar hem kimi içerlerdä. Ama yapının ikinci katın sol tarafında derindän düzücülük işleri lääzım yapılsınnar.
«Karşılamak odasında plitla erä koyuldu, aynalı direklär yapıldılar, eşiklerin bölümü yapıldı, diskoteka odası. Remont yapıldı, ama muzıka tertipleri yok, stereo kolonkalar, şafklar. Bizdä derneklerä 174 kişi gezer. Burada oyunnar, vokal, gitarada hem tenisa oynamak, bibliotekamız çalışȇr»,- Svetlıy Kultura Evin başı Larisa Ponomar söledi.
Svetlıyın kultura evi 1978 yılda yapıldı. Ozamandan kurumda remont işleri yapılmadılar.
