Eniliklerä görä, psihologiyä uurunda uzmannar lääzım olacȇk liţenziyayı kabletsinnär hem kasa aparadını kullansınnar. Psihologlar kendi izmetleri için çekları vereceklär hem vergileri ödeyeceklär. Bundan kaarä kontrol etmeklär geçeceklär, ki belli etmää onnarın zanaat uurlarını hem var mı diplomaları. Eer belli olarsaydı, ani psiholog liţenziyasız çalışȇr ona ceza koyulacȇk.
Şindiki vakıt Moldovada belli diil psihologların sayısı.Eni kanon proektinä görä kurulacȇk psihologların Milli kolegiyası, angısı cuvap edecek liţenziyä verilmesi için hem kontrol edecek bu uzmannarın işini. Liţenziyä verilecek alarak esaba diplomu hem profesional becermeklerini. Psihologlar lääzım kasa aparatlarını kullansınnar hem temsil edilmiş izmetleri için çekları versinnär, nışannȇȇr proektin avtoru Parlamentin deputatı Liliana Grosu.
«Kanon proektinä görä, hepsi psihologlar, angıları isteyeceklär bölä uurda çalışmaa, lääzım olacȇk kabletmää serbest praktika için atestatı psihologlar Milli kolegiyasından. Da barabar atestatın kabletmesinnän uzman düşeçek psihologların birleşik reestrasına»,- Parlamentin deputatı Liliana Grosu açıkladı.
Psihologiyä izmetlerinä paaların kurulmasınnan baalı soruş daartışmakaları peydalandı, özel uzmanannarın aralarında açan kanon proekti bakılardı. Bu ölçülerin neeti açık hem dooru kontrol etmää psihologların işini, hem korumaa insannarın haklarını, urguladı Liliana Grosu.
«Bizdä administrativ hem zından kodeksindä var eterli statya, angılarına görä kendini diil dooru götürmesi cezalansın var nasıl. Kanona karşı çalışmak cezalanacȇk diil psihologların Milli kolegiyasınnan, ama devlet organınnan, neçin ki kanona karşı iş var nicä olsun mediţina, injeneriyä, düzmäk uurlarında. Hem da psihologiyä bölümündä dä. Ne biz yapȇrız, ki insan raatlıkta olsun, açan onnar zanaatçılara danışȇrlar. Kurȇrız psihologların birleşik reestrasını, angısı açık olacȇk. Da açan kişi aarayacȇk uzmanı, ki o yardımcı olsun problema çözülmesindä , o açacȇk reestrayı da görecek, ani ayırılmış psihologta var lääzımnı hazırlanmaklar hem dokumentlär»,- dedi Grosu.
Psiholog Emiliya Bratunova kendi bakışını açıkladı eni kuralların giriştirmesi için.
«Bän bunu ii notalȇȇrım hem kablederim, neçin ki başka devletlerdä çoktan var kurumnar, angıları psihologların işini kontrol ederlär, hem da cezalȇȇrlar, eer yardım lääzımnı uurda verilmediysä. Herzaman düşünersin, ani zanaatçıların kontrol etmesi getirecek ona, ani insan korkmayacȇk yardım için danışmaa, eer devlet uurunda kontrol etmeklär olarsayd»,- nışannadı psiholog.
Kanon proekti belli eder psihologların haklarını da, onnarın arasında klientların problemalarını üzä çıkarmamaa, hak atılmaa yardım verilmnesindän eer klient kendini diil lääzımnı uurda götürärsäydi.
«En ilkin var durumnar, açan insan diil profesional yardımı kableder, neçin ki benim işimdä bän diil bir keret karşı geldim durumnan açan insan bilmeer bu uzman psiholog mı osa diil. Da insan bölä uzmannara yardım için geler, ama onanar var nasıl ta pek zarar yapsınnar. Bän şansora susȇrım, ani yardım olmayacȇk. Ama eer insan danışarsa sade becerekli uzmannara, angıları türlü kontrol etmeklerini, kanona görä, belli edilän programalara görä geçtilär, ozaman onnar lääzımnı yardımı kabledeceklär. İnsan korkmayacȇk çıkışlar da taa üüsek olacȇklar hem da insanın yaşaması taa ii olacȇk».
Bekleniler, ani liţenziyaya görä işleyän psihologlar reestranın kurulması hem belli edilän paaların giriştirmesi yardım edeceklär psihologiyä yardımı taa yakışıklı olsun hem onun kalitesi cuvap etsin milli standartlarına.
